Almatyda jańa zamanaýı óner mýzeıi ashyldy
ASTANA. KAZINFORM – 2025 jyldyń 9 qyrkúıeginde Almatyda kásipker ári metsenat, kollektsıoner Nurlan Smaǵulov negizin qalaǵan Almaty Museum of Arts zamanaýı óner mýzeıi ashyldy. Bul týraly Mádenıet jáne aqparat mınıstrliginiń baspasóz qyzmeti habarlady.
Almaty Museum of Arts-tyń mıssııasy – zamanaýı óner úderisterin qoldaý jáne zertteý, olardyń álemdik mádenıettegi mańyzyn ashý. Mýzeı qoryna Qazaqstannan jáne basqa da elderden jınalǵan 700 óner týyndysy endi.
Mýzeıdiń kórkemdik strategııasy men baǵdarlamalyq mazmunyn kórkemdik jetekshi Merýert Qalıeva ázirleıdi. Mýzeıde eki joba ashyldy. Onyń biri – «Qonaqtar» atty mýzeıdiń óz kollektsııasy qoıylǵan kórme jáne qazaqstandyq sýretshi Almagúl Meńlibaevanyń «Men bárin túsinemin» atty retrospektıvalyq ekspozıtsııasy.
Mýzeıdiń ashylý saltanatyna QR Mádenıet jáne aqparat mınıstri Aıda Balaeva, Almaty qalasynyń ákimi Darhan Satybaldy, mýzeıdiń negizin qalaýshy Nurlan Smaǵulov, sondaı-aq óner salasy jáne BAQ ókilderi qatysty.
Іs-shara barysynda Aıda Balaeva bul mýzeı ónerdi, zamanaýı tehnologııalardy, mýltımedııalyq sheshimder men kreatıvti ındýstrııa quraldaryn biriktiretin jańa mádenı bastama ekenin atap ótti. Mınıstr Prezıdent Qasym-Jomart Toqaevtyń joldaýynda aıtqan sózderin eske salyp, qazaqstandyq jas urpaq úshin patrıotızmniń basty kórsetkishi jasampazdyq pen jańashyldyqta ekenin jetkizdi. Ol úlgi retinde kásipker ári metsenat Nurlan Smaǵulovtyń elge etken qyzmetin atap ótti.
– Bul mýzeı tek ónerdi tamashalaý alańy emes, shyǵarmashylyq oıdyń, jańa ıdeıalar men halyqaralyq dıalogtyń ortalyǵyna aınalatynyna senemin. Mýzeı Almatynyń mádenı ómirin baıytyp, Ortalyq Azııa ónerin halyqaralyq deńgeıde damytýǵa zor úles qosady, - dedi Aıda Balaeva.
Jalpy aýmaǵy 10 myń m²-den asatyn mýzeı ǵımaratyn brıtandyq Chapman Taylor sáýlet bıýrosy jobalaǵan. Birinshi qabatta keń kórme zaldary ornalasqan, sonyń ishinde «Uly dala» jáne «Saryarqa» zaldary bar. Ortalyq keńistik Art Street atrıýmyna berilgen, ol Sharyn shatqalynyń tabıǵı pishinderin beıneleıdi. Sondaı-aq munda kásibı qor saqtaý orny, restavratsııalyq ortalyq jáne «Sheberhana» atty kreatıvti keńistik ornalasqan.
Mýzeı kollektsııasynyń 70%-dan astamy HH ǵasyrdyń kórnekti qazaqstandyq sýretshilerdiń eńbeginen turady. Atap aıtsaq, Jańataı Shárdenov, Toqbolat Toǵyzbaev, Maqym Qısamedınov jáne Shaımardan Sarıevtiń shyǵarmalary qoıylǵan. Sondaı-aq qazaqstandyq zamanaýı ónerdiń negizgi tulǵalary atanǵan Rústem Halfın, Saýle Súleımenova jáne Saıd Atabekovtiń jumystary da bar. Bolashaqta mýzeı óz kollektsııasyn tolyqtyryp, maqsatyn jalǵastyra bermek. Murajaı Qazaqstan men Ortalyq Azııa aımaǵyndaǵy ónerdi usyný jáne zertteý jáne halyqaralyq deńgeıde tanytýdy maqsat etedi.
Mýzeı 12 qyrkúıekten bastap jumysyn bastaıdy.