Almatyda zańsyz jumys istegen 22 sheteldik elden shyǵaryldy
ALMATY. KAZINFORM – Almaty polıtsııasy 26-28 tamyz aralyǵynda “Quqyqtyq tártip” is-sharasyna ótkizip jatyr. Іs-shara aıasynda Kóshi-qon zańnamasyn buzǵan 117 sheteldik ákimshilik jaýapkershilikke tartyldy.
- Іs-sharanyń birinshi kúninde QR Kóshi-qon zańnamasyn buzǵany úshin 117 sheteldik ákimshilik jaýapkershilikke tartyldy, olardyń kópshiligi jeke qurylysta jáne qurylys nysandarynda jumys istegen. 22 shetel azamaty elden shyǵaryldy, taǵy 42 adam reıd qorytyndysy boıynsha PD-niń qabyldap-taratýyna ornalastyryldy. – Olardyń arasynda jeke basyn kýálandyratyn qujattary bolmaǵan Nıgerııa azamaty da bar, – dedi Almaty qalalyq PD kóshi-qon qyzmeti basqarmasynyń bastyǵy Ashat Býtýnchınov.
Tártip saqshylary qalada zańsyz turyp jatqan shetel azamattarynyń shoǵyrlanǵan jerlerin, atap aıtqanda qonaq úılerdi, jaldamaly páterlerdi, jataqhanalardy, stıhııalyq eńbek bırjalary men qurylys nysandaryn muqııat tekserip jatyr.
Eske salaıyq, buǵan deıin Almaty oblysynda kóshi-qon zańnamasyn buzǵan 100-den astam sheteldik ustalǵanyn jazǵanbyz.
