Almatyda zańsyz salynǵan turǵyn úı keshenin buzý bastaldy

ALMATY. KAZINFORM — Almatynyń qala qurylysyn baqylaý basqarmasynyń ókilderi «Mádenıet» shaǵynaýdany, 185/8 mekenjaıynda ornalasqan «Dostar Delıýks» az qabatty turǵyn úı keshenin buzý jumystary bastalǵanyn aıtty. 

Buǵan deıin jospardan tys tekserý barysynda nysannyń qujattary tolyq emes ekeni anyqtalǵan. Menshik ıesine qatysty ákimshilik sharalar qabyldanyp, jer ýchaskesin bastapqy qalpyna keltirý týraly nusqama berilgen.

— 2024 jyly 5 tamyzda basqarma nusqamany májbúrlep oryndatý týraly talap aryzdy Almaty qalasynyń mamandandyrylǵan aýdanaralyq ekonomıkalyq sotyna joldady. Sot sheshimimen talap aryz tolyq kólemde qanaǵattandyryldy. 2025 jyly 27 naýryzda Almaty qalalyq soty birinshi satyly sot sheshimin ózgerissiz qaldyrdy, — dep habarlady basqarma.

Osydan keıin materıaldar oryndaý úshin qalalyq Ádilet departamentine joldandy.

Sot sheshimin oryndaý aıasynda menshik ıesi nysandy buzyp, aýmaqty qaıtadan kómdi.

Eske salaıyq, buǵan deıin Almatyda Aqsaı-5 shaǵynaýdany, 25-úı mekenjaıyndaǵy kezekti zańsyz salynǵan qosalqy nysan buzylǵanyn jazǵanbyz.