Almatyda zańsyz eńbek mıgranttary ustaldy
ALMATY. KAZINFORM – Túrksib aýdandyq polıtsııa basqarmasy kóshi-qon qyzmetiniń mamandary reıd barysynda zańsyz jumys istep júrgen 15 shetel azamatyn anyqtady.
Túrksib aýdandyq polıtsııa basqarmasynyń bastyǵy Dýman Aýhadıevtiń sózinshe, sheteldikterdi jóndeý jumystaryn júrgizý úshin jeke kompanııa jaldaǵan. Kóshi-qon rejımin buzýshylar Polıtsııa departamentiniń qabyldap-taratýyna ornalastyryldy.
– Qazir polıtsııa qyzmetkerleri sheteldik jumys kúshin zańsyz paıdalanýdy uıymdastyrǵan jumys berýshilerdi anyqtap, ákimshilik jaýapkershilikke tartý jumystaryn jalǵastyryp jatyr. Bizdiń basty mindetimiz - zań talaptarynyń saqtalýyn qamtamasyz etý. Sheteldik jumys kúshin zańsyz paıdalaný zańdy buzyp qana qoımaı, qaýip tóndiredi. Reıdtik sharalar turaqty túrde jalǵasatyn bolady, – deıdi Dýman Aýhadıev.
Osyǵan deıin QR Eńbek jáne halyqty áleýmettik qorǵaý mınıstrligi bizdiń elge eńbekshi mıgranttar kóbine Qytaı, Túrkııa, Ózbekstan, Úndistan, Ulybrıtanııa, Majarstan, Serbııa, Ýkraına jáne Italııadan keletini týraly aıtqan bolatyn.
Mınıstrliktiń málimetinshe, Qazaqstan aýmaǵynda jergilikti atqarýshy organdardyń ruqsaty boıynsha 13 233 shetel azamaty jumys isteıdi.