Almatyda úsh jańa sý tazartý nysany salynyp jatyr

ALMATY. KAZINFORM – Almatynyń aýyzsý júıesin jańartý aıasynda qalada birden úsh jańa sý tazartý nysanynyń qurylysy júrip jatyr.

«Almaty Sý» memlekettik kommýnaldyq kásipornynyń resmı ókili Serik Shaǵyrovtyń aıtýyna qaraǵanda, qazirgi tańda Naýryzbaı jáne Alataý aýdandaryndaǵy áleýmettik nysandar men turǵyn úılerdi ortalyqtandyrylǵan káriz júıesine qosý úshin qala syrtyndaǵy káriz kollektorynyń qurylysy bastaldy. Sonymen qatar jańa úsh sý tazartý nysany salynyp jatyr.

– Turǵyndardan kelip túsetin ózekti máselelerdiń biri – jelilerdi salý jáne qaıta qurý jumystaryna baılanysty qazylǵan aýmaqtar. Keıingi onjyldyqta Almatynyń aýmaǵy edáýir ulǵaıdy. 2011 jyldan beri qala kólemi eki eseden astam ulǵaıyp, nátıjesinde keıingi eki jylda 500 shaqyrymnan astam jańa jeli paıdalanýǵa berildi, al jyl sońyna deıin taǵy 260 shaqyrym sý jáne káriz jelilerin salý aıaqtalady, - dedi ol.

Kásiporynnyń óz qarajaty esebinen tozý deńgeıi 90%-dan asqan 42 nysandaǵy 65 shaqyrym jeli jańartylyp jatyr. Jalpy Almatyda 2 000 shaqyrym sý jáne 1 000 shaqyrym káriz jelisin kezeń-kezeńimen aýystyrý qajet.

Mańyzdy jobalardyń biri – Myńbaev kóshesindegi magıstraldyq sý qubyryn tolyq aýystyrý. Bul jeli 1971 jyldan beri paıdalanylyp keledi, keıingi bes jylda munda 38 apat tirkelgen. Qaıta qurý jumystary aıaqtalǵan soń 60 myńnan astam turǵyn turaqty sýmen qamtylady.

2025 jyly tórt sorǵy stantsııasy jóndelip, 200 sorǵy jabdyǵy men 444 japqysh armatýra aýystyrylady. Sondaı-aq tórt transformatorlyq qosalqy stantsııany qaıta qurý jáne eki taza sý rezervýaryn salý josparlanǵan.

Osyǵan deıin Almatyda jyl sońyna deıin myńnan astam sham aýystyrylatyny týraly jazdyq.