Almatyda úsh kúnde eki myńǵa jýyq jer dúmpýi tirkeldi
ALMATY. KAZINFORM - Seısmıkalyq zertteýler ulttyq ǵylymı ortalyǵynyń mamandary úsh kún ishinde Almaty mańynda eki myńǵa jýyq jer dúmpýin tirkedi.
Ulttyq seısmologııalyq baqylaý jáne zertteýler ǵylymı ortalyǵynyń seısmologııalyq observatorııa basshysy Jansaıa Dosymbekovanyń aıtýynsha, osydan úsh kún buryn Qytaı men Qyrǵyzstan shekarasynda bolǵan jer silkinisinen keıin elde álsin-álsin jer dúmpýi áli jalǵasyp jatyr.
«Qazirgi tańda 2 myńǵa jýyq álsiz jer silkinisteri tirkeldi. Onyń 10-yn almatylyqtar sezindi. Jer dúmpýi 2-3 ball deńgeıinde boldy. Sońǵysy túngi saǵat ekiler shamasynda tirkeldi», - deıdi maman.
Spıkerdiń sózinshe, bul dúmpýler qaýip tóndirmeıdi.
«Sebebi mundaı jer silkinisinen keıin álsiz dúmpýler mindetti túrde bolyp turady. Ol jyldar boıy sozylýy múmkin. Sondyqtan turǵyndarǵa qorqýyǵa negiz joq», - dedi ol.
Eske salaıyq, 23 qańtar túnde Almatyda 5 ball deńgeıinde jer silkindi. Almatylyqtardyń aıtýynsha, jerasty dúmpýi osy joly qatty sezildi. Uzaq ýaqyt boıy shaıqalǵan. Turyǵyndar úreılenip, úıinen kóshege, dalaǵa shyqty.
