Almatyda úsh kúdikti áleýmettik jeli arqyly adamdardy aldap, aqsha bopsalaǵan

ALMATY. KAZINFORM –  Almatyda áleýmettik jeli arqyly jábirlenýshini aldap, qylmys jasaǵan kúdiktiler ustaldy.

Almaty polıtsııa departamenti baspasóz qyzmetiniń habarlaýynsha, buǵan deıin áleýmettik jelide qylmyskerler ózin áıel retinde kórsetip, er adamdarmen tanysqan birneshe jaǵdaı tirkelgen. Habarlamalar almasyp, jábirlenýshiniń páterinde kezdesý uıymdastyrǵannan keıin onyń «tanystary» kelip, aǵasy sııaqty keıip tanytqan. Olar jynystyq sıpattaǵy zorlyq-zombylyq týraly shaǵym túsiremiz dep qorqytyp, aqsha bopsalaǵan.

Jýyrda osyndaı oqıǵalardyń biri Jetisý aýdanynda áshkerelendi. Úsh kúdikti: áıel adam men onyń eki sybaılasy ustaldy. Barlyǵy ýaqytsha ustaý ızolıatoryna qamaldy.

Atalǵan derek boıynsha qylmystyq is qozǵalyp, sotqa deıingi tergeý júrgizilip jatyr.

– Qala turǵyndaryna ınternet arqyly tanysý árdaıym qaýip tóndirýi múmkin ekenin eskertemiz. Sondyqtan beıtanys adamdarǵa senbeýge, saq bolýǵa, eger qorqytý nemese bopsalaý jaǵdaıy bolsa, dereý polıtsııaǵa habarlaýǵa shaqyramyz. Árbir osyndaı derek muqııat tekserilip, kináliler zańǵa sáıkes jaýapkershilikke tartylady, - dedi Jetisý aýdandyq polıtsııa basqarmasynyń bastyǵy Jánibek Shynasylov.

Eske salaıyq, buǵan deıin Pavlodarda áskerı qyzmetshini bopsalap, aqsha alyp kelgender ustalǵanyn habarlaǵanbyz.