Almatyda úsh avtobýs soqtyǵysty: zardap shekkender bar

ALMATY. KAZINFORM – Almatynyń ortalyǵynda úsh avtobýs pen jeńil mashına soqtyǵysty. Onyń vıdeosy áleýmettik jelide tarady. Beınejazbadan polıtsııa qyzmetkeriniń bir adamdy kóterip alǵanyn jáne avtobýstan jolaýshylardyń túsip jatqanyn kórýge bolady.

Almaty qalalyq polıtsııa departamentiniń málimetinshe, jol apaty búgin, 13 aqpanda saǵat 09:00 shamasynda Raıymbek dańǵylynda boldy.

«Raıymbek dańǵylymen kele jatqan №54-baǵyttaǵy qoǵamdyq kóliktiń júrgizýshisi aldynda qozǵalyp bara jatqan №133-baǵyttaǵy avtobýspen jáne Nexia markaly mashınamen soqtyǵysqan. Osy kezde 133-shi avtobýs ınertsııa saldarynan sol baǵytta kele jatqan №88-shi qoǵamdyq kólikke soǵyldy. Zardap shekkenderge medıtsınalyq kómek kórsetildi», - dep habarlady polıtsııadan.

Vedomstvodan atap ótkendeı, jol apatyna ushyraǵan úsh qoǵamdyq kólik jeke tasymaldaýshylarǵa tıesili.

«Jol -kólik oqıǵasyna qatysty derekti Medeý aýdandyq polıtsııa basqarmasynyń qyzmetkerleri tekserip jatyr. Oqıǵanyń basqa da mán-jaılary anyqtalýda», - dep habarlady qalalyq polıtsııa departamentinen.