Almatyda úlesker tartýǵa tek 28 turǵyn úıge ruqsat berilgen
ALMATY. KAZINFORM — Almatyda úleskerlerdi tartýǵa ruqsaty bar turǵyn úı keshenderiniń tizimi jasaldy.
Sáýlet jáne qala qurylysy basqarmasynyń málimetinshe, qala aýmaǵyndaǵy 28 turǵyn úı qurylysy nysanyna úleskerlerdiń qarajatyn tartýǵa ruqsat berilgen.
Eske salaıyq, 2025 jyly maýsymda «Turǵyn úı qurylysyna úlestik qatysý týraly» Qazaqstan Respýblıkasynyń Zańyna ózgerister engizildi. Zań boıynsha qurylys kompanııasyna úleskerlerdiń qarajatyn tartýǵa ruqsaty joq bolsa, biregeı operatordyń kepildik sharty jasalmasa, ne bank arqyly jobalyq qarjylandyrý júzege aspasa, kóppáterli jáne jeke turǵyn úılerdi jarnamalaýǵa tikeleı tyıym salyndy.
Sondaı-aq buǵan deıin jobalyq-smetalyq qujattamanyń negizinde jarnama ornalastyrýǵa múmkindik bergen norma alynyp tastaldy.
— Azamattarǵa alǵashqy naryqtaǵy kúmándi mámileden saqtaný úshin baspana satyp almas buryn qurylys salýshynyń ruqsat qujattaryn muqııat tekserýge keńes beredi, — dep habarlady vedomstvo.
Úleskerlerdiń qarajatyn tartýǵa ruqsat pen ózge de ruqsat qujattarynyń bar-joǵyn tekserý úshin azamattar myna baılanys nómerlerine júgine alady:
- Qurylysqa qatysty ruqsat qujattary boıynsha — Qala qurylysyn baqylaý basqarmasynyń anyqtamalyq Call-ortalyǵy: +7 (705-89) 6-60-00
- Úleskerlerdiń qarajatyn tartýǵa ruqsat boıynsha — Sáýlet jáne qala qurylysy basqarmasy: +7 (727-24) 0-80-00
- «QTK» AQ turǵyn úı portaly — homeportal.kz
Eske salaıyq, bıyl úleskerler máselesi boıynsha Almatyda 4 qurylys kompanııasyna 300 aryz túskenin jazǵanbyz.