Almatyda tirkelgen mopedterdiń sany 2 myńnan asty

ALMATY. KAZINFORM - Almatyda búgingi kúni 2 myń 13 moped ıesi resmı tirkelgen.

Megapolıste 11 qańtardan bastap pılottyq joba aıasynda mopedterdi tirkeýge ruqsat beretin erejeler kúshine endi.

— Osy jyldyń 5 sáýirinen keıin mopedin ýákiletti organda tirkemegen jáne «A1» sanatyndaǵy júrgizýshi kýáliginsiz mopedti basqarǵan júrgizýshiler ákimshilik jaýapkershilikke tartylatyn bolady. Al kólik quraly mamandandyrylǵan aıyppul turaǵyna ornalastyrylady, — dedi Ákimshilik polıtsııa basqarmasynyń ókili Aıdyn Merkimbaev.

Eske salaıyq, Qazaqstan Respýblıkasynyń «Jol qozǵalysy týraly» zańyna engizilgen ózgeristerge sáıkes, mopedter mehanıkalyq kólik quraldaryna teńestirildi.

Sondyqtan mopedterdi tirkeýden ótkizý úshin menshik ıesi turǵylyqty jeri boıynsha Arnaıy Halyqqa qyzmet kórsetý ortalyqtarynda rásimdeý kerek.

Ol úshin kelesi qujattar qajet:

* Jeke kýálik (elektrondy formatta usynýǵa bolady);
* Tirkeý týraly ótinishti toltyrý;
* Mopedtiń tehnıkalyq qujattary nemese onyń tehnıkalyq sıpattamalary týraly málimetter;
* Mopedti tehnıkalyq tekserýden ótkizý;
* Memlekettik alymdardy tóleý:
* Tirkeý úshin — 983 teńge (0,25 AEK); * Tirkeý kýáligin berý úshin — 4 915 teńge (1,25 AEK); * Memlekettik nómirdi berý úshin — 5 505 teńge (1,4 AEK).

20 qańtar kúni Almatyda alǵashqy moped tirkelip, nómir alǵanyn jazǵanbyz.

Ótken aıda Almatyda myńnan astam moped tirkelgenin jazǵanbyz.