Almatyda transulttyq uıymdasqan qylmystyq top músheleri sottaldy

ALMATY. KAZINFORM – Almatyda transulttyq uıymdasqan qylmystyq top múshelerine úkim shyqty.

Belgili bolǵandaı, aıyptalýshylar Qazaqstanda birneshe esirtki zerthanalaryn quryp, sıntetıkalyq esirtki jetkizýshileri men betbelgi qoıýshylardy «jumysqa» tartýdy kózdegen.

Halyqaralyq qylmystyq top ІІM men Almaty polıtsııasynyń júrgizgen jedel jumysynyń nátıjesinde qolǵa tústi.

Arnaıy is-sharanyń ártúrli kezeńderinde polıtsııa qyzmetkerleri prekýrsorlardyń kontrabandasymen aınalysqan úsh sheteldikti ustady.

Jalǵa alynǵan qoımalardy ruqsat etilgen tintý barysynda psıhoaktıvti zattardy sıntezdeýge arnalǵan 1160 bóshke, ártúrli prekýrsorlar, «sıntetıka» óndirýge arnalǵan 7 qorap arnaıy zerthanalyq jabdyq, eki reaktor jáne 5 hımııalyq qural-jabdyq tabylyp, tárkilendi.

– Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen atalǵan uıymdasqan qylmystyq toptyń tórt múshesi joǵaryda atalǵan qylmystardy jasaǵany úshin kináli dep tanylyp, 10 jyldan 14 jylǵa deıin bas bostandyǵynan aıyryldy, – dep habarlady polıtsııadan.

Osyǵan deıin elge esirtki tasymaldap kelgen Qazaqstan azamaty men eki sheteldik sottalǵan bolatyn.