Almatyda tórt onlaın kazıno jabyldy
ALMATY. KAZINFORM — Megapolıste zańsyz oıyn bıznesi boıynsha 5 qylmystyq is tirkeldi. Bul týraly óńirlik kommýnıkatsııalar qyzmetiniń brıfınginde Almaty qalasy boıynsha Ekonomıkalyq tergep-tekserý departamentiniń tergeý basqarmasy basshysy Sáken Qondybaev málim etti.
Spıker Ekonomıkalyq tergeý departamentiniń basym mindetteriniń biri zańsyz oıyn bıznesimen kúres ekenin atap ótti.
«Zańnyń 11-babyna sáıkes kazıno men oıyn avtomattarynyń zaldaryn Almaty oblysynda (Qapshaǵaı) jáne Aqmola oblysynda (Şýche aýdany) ornalastyrýǵa bolady. Basqa jerlerde ashý zańsyz dep tanylady», - dedi Sáken Qondybaev.
Aıtýynsha, zańsyz jumys istegen 4 onlaın kazıno men bir oıyn zaly jabyldy.
«Byltyr zańsyz qumar oıyn uıymdastyrý isi boıynsha 14 fakti anyqtaldy. Uıymdastyrýshylar qylmystyq jaýapkershilikke tartyldy», - deıdi Ekonomıkalyq tergep-tekserý departamentiniń basshysy.
Sonymen qatar, ol sala mamandary qazir Memleket basshysy qol qoıǵan jańa zań aıasynda jumystar júrgizip jatqanyn jetkizdi.
Máselen, qyrkúıekten bastap býkmekerler men totalızatorlardy jarnamalaýǵa resmı túrde tyıym salynady. Olar tek sport ǵımarattarynda, sportshylar kıimi men halyqaralyq jarystarda ǵana jarnama jasaı alady. Biraq 21 jasqa tolmaǵandar, boryshkerler, memlekettik, áskerı jáne quqyq qorǵaý organdarynyń qyzmetkerleri men bıýdjettik kompanııa basshylary bás tige almaıdy.
«Lotereıa qyzmetin retteý tetikteri jańartylǵan. Naqtyraq aıtqanda, turǵyn úılerde, jataqhanalarda, mádenı uıymdardyń ǵımarattary men áleýmettik nysandarda, bilim berý, densaýlyq saqtaý sondaı aq 100 metr qashyqtyqta lotereıa bıletterin taratýǵa jáne lotereıa termınaldaryn ornatýǵa tyıym salynǵan», - dedi ol.