Almatyda toǵyzqumalaqtan álem chempıondary belgili boldy
Almatyda qyrkúıektiń 21-24 aralyǵynda toǵyzqumalaqtan oqýshylar arasynda (U-15, U-17) tuńǵysh ret álem chempıonaty ótti, dep habarlaıdy QazAqparat tilshisi.
Jarys júldegerlerin marapattaý rásimine qatysqan Dúnıejúzilik jáne respýblıkalyq toǵyzqumalaq federatsııasynyń prezıdenti Álıhan Baımenov toǵyzqumalaq oıynyn álemde damytý men nasıhattaý jumysy qalaı júrip jatqanyn aıtyp berdi.
«Qazaqstandyq mamandar iOS pen Android-qa toǵyzqumalaq oıynyn engizdi, endi sol jerden kez kelgen adam toǵyzqumalaq oıynyn jazyp alyp, onlaın oınaı alady. Sondaı-aq bizde toǵyzqumalaq baǵdarlamalarynyń jarysy ótip turady. Ol boıynsha Chehııa, Germanııa elderiniń ókilderi joǵary nátıje kórsetip júr. Búgingi kúni Kanadanyń igamecentre.com, Polshanyń PlayOK.com saıttarynda toǵyzqumalaq eń jıi oınalatyn zııatkerlik oıynnyń deńgeıine jetken. Eske salsaq, 2020 jyly ıÝNESKO toǵyzqumalaq oıynyn „adamzattyń mádenı murasy“ tizimine engizgen bolatyn. Búgingi jarysta Pákistannan kelgen delegatsııa toǵyzqumalaqtan kelesi Azııa birinshiligin óz elinde ótkizýdi usyndy. Bangladesh ózderiniń ulttyq bedeldi basylymdarynda toǵyzqumalaq týraly maqalalar jarııalap jatyr. Aldaǵy ýaqytta búgingideı jarystardy teledıdar, kompıýterden onlaın kórýge bolatyndaı jaǵdaı jasamaqpyz. Aıta keteıin, biz toǵyzqumalaq taqtasy men qumalaqtardyń materıaldaryn jetildirip kelemiz. Mysaly, osy jarysta oıynshylar alǵash ret dybysy qatty shyqpaıtyn materıaldan jasalǵan taqta jáne qumalaqpen oınady. Odan bólek, chehııalyq orynbasarym toǵyzqumalaq erejelerin mýzykaǵa salypty. Bul ómiri bolmaǵan dúnıe», — deıdi Álıhan Báımenov.
Qazaqstanda buǵan deıin toǵyzqumalaqtan 6 márte álem chempıonaty ótken.
«2008 jyly toǵyzqumalaqtan dúnıejúzilik federatsııa qurylǵaly beri elimizde eresekter arasynda 6 márte álem chempıonaty, 5 Azııa chempıonaty, 4 Eýropa chempıonaty ótti. Al oqýshylar arasynda álem chempıonaty tuńǵysh ret ótip otyr. Oǵan 17 memleketten jasóspirimder qatysty. Jarys joǵary deńgeıde ótti. Osy oraıda jarystyń ótýine qoldaý kórsetken Almaty ákimdigine, máslıhatyna, Týrızm jáne sport, Oqý aǵartý mınıstrikterine, olardyń basshylaryna federatsııa atynan alǵys aıtamyn. Aıta keteıin, búginde álemniń otyzdan astam memleketinde turaqty toǵyzqumalaq oınap júrgen adamdar bar. Olar — qazaq emes, jergilikti halyqtyń ókilderi. Sondyqtan toǵyzqumalaq oıyny álemde jaqsy damyp keledi deýge bolady», — deıdi ol.
Jarysta úshinshi oryn alǵan kolýmbııalyq Orlando Gvıdo Vergel Benıtes toǵyzqumalaq oıyny týraly mektep qabyrǵasynda estigen.
«Jasym 15-te. Bizdiń mekteptiń kitaphanasynda aqyl-oıǵa arnalǵan oıyndar qaýymdastyǵy jumys isteıdi. Oǵan múshe bolǵan soń toǵyzqumalaq oıyny jaıly estip, bildim. Maǵan bul oıyndy qaýymdastyqtyń dırektory úıretti. Ol sondaı-aq meni osy jarysqa alyp keldi. Bul — meniń alǵashqy jarysym. Jalpy, toǵyzqumalaqtyń adamnyń sana-sezimine, aqyl-oıynyń damýyna jaqsy áser etetinin baıqadym. Toǵyzqumalaqtan basqa qazaqtyń ulttyq oıyny „asyq atýdy“ bilemin», — dedi ol.
Baıqaýda sondaı-aq 17 jasqa deıin qyzdar arasynda ıspanııalyq Aleksandra Javoronkova Amıgo qola medalge ıe boldy.
«Madrıd qalasynan kelip turmyn. Bıyl jazda toǵyzqumalaq oınaýdy bastadym. Janat esimdi bapkerim baýlydy. Ol Ispanııada turady jáne meni osynda alyp keldi. Toǵyzqumalaq oıynyna kelgen sebebim, ol men qatysatyn basqa sport túrlerine uqsamaıdy. Negizi bul — fızıkalyq emes, otyryp, oılanyp oınaıtyn oıyn. Bir jaǵynan doıby, shahmatqa da uqsaıdy. Sol úshin toǵyzqumalaq oıyny adamnyń aqyl-oıynyń damýyna kóp paıdasy bar dep aıta alamyn», — deıdi Aleksandra.
Aıta keteıik, Almatyda ótken álem chempıonatynyń júlde qory — 8 mln teńge. Álemdik dodaǵa 17 elden 200-ge jýyq sportshy qatysty.
Jarys toǵyzqumalaqtyń «rapıd» jáne «blıts» túrlerinen ótti. Qazaqstan qurama komandasy «rapıd» jáne «blıtste» altynǵa qol jetkizdi.
Atap aıtqanda, «rapıd» boıynsha Mahmutjan Ázimhan, Ernur Batyr, Aıdana Moldabek jáne Aıana Isahan altynnan alqa taqsa, «blıts» boıynsha Samıra Orazmuhanbet, Ádilet Bekmahan, Vıktorııa Belıtskaıa jáne Sapar Tamerlan jarys chemıondary atandy.
