Almatyda toǵyz balaǵa qymbat operatsııa tegin jasaldy
Almaty balalar jedel medıtsınalyq kómek ortalyǵynda biregeı ári kúrdeli sanattaǵy hırýrgııalyq operatsııalar jasaldy dep habarlaıdy Kazinform.
Operatsııa nesep-jynys júıesiniń ártúrli týabitken patologııasy bar balalarǵa jasaldy.
Tańdalǵan naýqastardyń eń kishisi 2 jastan asqan bolsa, eń úlkeni — 16 jasta.
Almaty qalalyq densaýlyq saqtaý basqarmasynan atap ótkendeı, 11-14 jeltoqsan aralyǵynda balalar shuǵyl medıtsınalyq kómek kórsetý ortalyǵynda balalar ýrologtaryna arnalǵan sheberlik synyby ótti.
Oǵan Londonnan belgili ýrologııalyq hırýrgtardyń biri doktor Imran Mýshtak arnaıy shaqyrtyldy.
«Gıpospadııa sındromy jıi kezdesedi, ony tek hırýrgııalyq ota kómegimen ǵana emdeýge bolady. Eger ota erte jasta jasalmasa, balanyń eseıýi qıynǵa soǵady, zár shyǵarý kezinde qolaısyzdyq týady, mundaı dıagnozy bar jasóspirimderge eresek ómirge ótý qıyn. Otanyń mundaı túri birden nátıjege baǵyttalmaıdy, ol balanyń jaıly áleýmettenýine jaǵdaı jasap, bolashaǵyna áser etedi», — dep atap ótti professor Imran Mýshtak.
Professor Imran Mýshtakqa Astana, Almaty, Qaraǵandy jáne kórshiles Mońǵolııa, Ózbekstan jáne Tájikstannan kelgen balalar hırýrgtary kómektesti.
Operatsııa jasalǵan toǵyz balanyń bári palataǵa aýystyryldy, olardyń jaǵdaıy birqalypty.
«Ota kezinde plastıkalyq túzetý ádisin qoldanyp, terini aýystyrdyq: teri jamylǵylary qulaqtyń artynan alynady jáne uldarda ýretranyń anatomııalyq durys pishini jasalady. Biz bir de bir otandyq aýrýhanada jasalmaıtyn operatsııalardy tańdadyq, Qazaqstannyń ár óńirinen balalar shaqyryldy. Balalar ortalyqta mamandardyń baqylaýynda bolady, bul jaǵdaıda naýqas úshin otadan keıingi kútim, alǵashqy ońaltý jáne baqylaý óte mańyzdy», — deıdi Almaty balalar jedel medıtsınalyq kómek kórsetý ortalyǵy ýrologııa bóliminiń meńgerýshisi Azamat Raev.
