Almatyda tegin 10 sotyq jer berý toqtatyldy
ALMATY. KAZINFORM – Almatyda endi jeke turǵyn úı qurylysyna arnalǵan jer telimderi bólinbeıdi. Azamattar turǵyn úı keshenderi esebinen baspanamen qamtamasyz etiledi.
Bul týraly Almaty qalasynyń jer qatynastary basqarmasy agenttik saýalyna bergen jaýabynda habarlady.
– Qazirgi tańda Almaty qalasynyń Bas jospary aıasynda qalalyq ınfraqurylymnyń barlyq baǵytyn damytýǵa arnalǵan birinshi kezektegi baǵdarlamalardy ázirleý jáne júzege asyrý kózdelgen. Bul – kópqabatty nemese qabaty az qurylysty damytý, turǵyn úılerdi qaıta jańǵyrtý. Aýdandyq naqty jospar tujyrymdamasy eski qurylysty súrip, áleýmettik nysandar men ınjenerlik jelilerdi damytýǵa negizdelgen, - delingen jaýapta.
Qala aýmaǵynda jeke turǵyn úı qurylysyna arnalǵan alańdar qarastyrylmaǵan.
– Osyǵan baılanysty Almaty qalasynda jeke turǵyn úı qurylysyna arnalǵan jer telimderin daıyndalyp, berilmeıdi jáne kezek júrgizilmeıdi. Bul maqsattarǵa bıýdjet qarajaty bólinbeıdi, - dep habarlady jer qatynastary basqarmasy.
Sonymen qatar vedomstvo jaýabyna sáıkes, 2022 jyldan 2025 jylǵa deıin Almatyda jeke turǵyn úı qurylysyna jer telimderi berilmegen.
Eske salaıyq, buǵan deıin Astana jeke turǵyn úı qurylysyna tegin 10 sotyq jer bólinbeıtinin jazǵanbyz.