Almaty taýlarynda joǵalyp ketken qyzdyń máıiti tabyldy
ALMATY. KAZINFORM — Almatyda Býtakov sarqyramasy mańynda joǵalyp ketken qyzdyń máıiti tabyldy.
Qalalyq tótenshe jaǵdaılar departamentiniń málimetinshe, 19 jeltoqsanda «102» qyzmetine marqumnyń týysy habarlasyp, qyzdyń taýly aımaqqa snoýbord tebýge ketkenin jáne sodan keıin baılanysqa shyqpaǵanyn aıtqan.
Aqparat túse salysymen TJM-niń aýmaqtyq bólimsheleriniń kúshteri men quraldary, polıtsııa qyzmetkerleri, Respýblıkalyq jedel-qutqarý jasaǵynyń qutqarýshylary, sondaı-aq eriktiler dereý jumyldyryldy. Oqıǵa ornynda Almaty qalasy men Almaty oblysynyń jedel shtaby quryldy.
Іzdeý-qutqarý jumystary kezinde Býtakov sarqyramasy aýdanynan áıel adamnyń máıiti tabyldy. Keıin máıitti teńiz deńgeıinen 2 100 metr bıiktikten Býtakov shatqalyndaǵy baqylaý-qutqarý beketine túsirilip, polıtsııa qyzmetkerlerine tapsyryldy.
Sot-medıtsınalyq saraptama taǵaıyndaldy. Barlyq qajetti saraptama aıaqtalǵannan keıin marqumnyń jeke basy túpkilikti anyqtalady.
Іzdeý jumystaryna barlyǵy 73 adam, 10 tehnıka birligi, 5 ushqyshsyz ushý apparaty jáne 3 kınologııalyq eseptop tartyldy.
Aıta ketelik Rıdderde qarda júretin tehnıkamen taýǵa ketip adasqan 9 adam qutqarylǵan edi.