Almatyda tarıhı tulǵalardyń zırattary tsıfrlyq kartaǵa engizildi
ALMATY. KAZINFORM — Megapolıste «Almatynyń tarıhı jady» jobasy kópshilikke jol tartty.
Almaty ákimdiginiń málimetinshe, bul bastama aıasynda adamdar tanymal tulǵalar men memleket jáne qoǵam qaıratkerleri ómir súrip, eńbek etken oryndardy aralap, olardyń eskertkishteri men memorıaldaryn, jerlengen jerlerin, tarıhı kósheler men nysandardy ońaı taba alady. 2GIS servısine barlyq nysan týraly aqparat úsh tilde — qazaq, orys jáne aǵylshyn tilderinde engizilgen.
Joba aıasynda Almatynyń Ortalyq zıraty, Keńsaı-1 jáne Keńsaı-2 zırattary alǵash ret sandyq formatta usynylyp otyr. Bul jerlerde Baýyrjan Momyshuly, Talǵat Bıgeldınov, Kúlásh Baıseıitova, Ahmet Jubanov, Muhtar Áýezov, Qasym Amanjolov, Sháken Aımanov syndy tarıhı tulǵalar jerlengen.
— Kóptegen damyǵan elde ashyq aspan astyndaǵy mýzeı uǵymy áldeqashan qalyptasqan. Mysaly, Parıjde týrıster Pıaf, Balzak pen Morrısonnyń qabirlerine taǵzym etý úshin Per-Lashez zıratyna barady. Vena men Pragada uly kompozıtorlardyń máńgilik mekenderi mádenı marshrýttyń ajyramas bóligi. Londonda Haıgeıt zıraty — ıntellektýaldyq muraǵa degen qurmettiń sımvoly. Almaty — elimizdiń mádenı astanasy. Bul shahar — ultymyzdyń rýhanı tiregi, tanymal tulǵalardyń mekeni. Biz zııaly tulǵalardyń eńbekterin nasıhattap, qaldyrǵan murasyn saqtap, ony keıingi urpaqqa jetkizip qana qoımaı, olarǵa quran baǵyshtap, zııarat etýge jaǵdaı jasaýǵa tıispiz. Biz joba aıasynda árbir beıittiń deregin naqtylap, kópshilikke qoljetimdi bolýyna mán berdik. Bul baǵyttaǵy jumysty ári qaraı jalǵastyramyz, — dedi Almaty qalasy Mádenıet basqarmasynyń basshysy Ǵanı Maılybaev.
Qazirgi tańda Almatynyń Ortalyq zıratynda — 115, Keńsaı-1-de — 159, al Keńsaı-2-de — 109 tulǵanyń beıiti kartaǵa engizildi. Olardyń ishinde Uly Otan soǵysy ardagerleri de bar: Ortalyq zıratta — 8, Keńsaı-1-de — 16, Keńsaı-2-de — 5 ardager jerlengen. Sondaı-aq qalada 160-qa jýyq eskertkish bar, onyń 48-i — kórnekti tulǵalarǵa arnalǵan.
Jobanyń júzege asýyna Mádenıet basqarmasynyń ókilderimen qatar, ádebıet synshysy, «Daryn» memlekettik jastar syılyǵynyń laýreaty Eldos Toqtarbaı, jazýshy-dramatýrg Álibek Baıbol, jýrnalıst, alashtanýshy Ushqyn Sáıdirahman, zertteýshi Zanǵar Kárimhan jáne mýzeıler birlestiginiń qyzmetkerleri atsalysqan.
Eske salaıyq, buǵan deıin Ekibastuzda majarlyq soǵys tutqyndarynyń zıraty tabylǵanyn jazǵanbyz.