Almatyda taǵy eki kitaphana táýlik boıy jumys isteıdi
ALMATY. KAZINFORM – Aqpan aıynan bastap taǵy eki qalalyq kitaphana – Áýezov aýdanyndaǵy Qazaqstan jazýshylary kitaphanasy jáne Bostandyq aýdanyndaǵy Almaty Kitaphanalarynyń fılıaly 24/7 rejıminde qyzmet kórsetedi.
Almaty ákimdiginiń habarlaýynsha, buǵan deıin qalada úsh kitaphana táýlik boıy jumys isteý tártibine kóshken edi. Olar Jambyl atyndaǵy qalalyq jasóspirimder kitaphanasy, Alatau Creative Hub ortalyǵy jáne Muhtar Áýezov atyndaǵy kitaphana. Osylaısha, Almatydaǵy táýlik boıy jumys isteıtin kitaphanalar sany beseý boldy.
Almatynyń 11-shaǵynaýdanynda, Altynsarın dańǵyly boıyndaǵy №37 úıde ornalasqan Qazaqstan jazýshylary kitaphanasy 1962 jyly ashylǵan jáne Áýezov aýdanyndaǵy jetekshi zııatkerlik ortalyqtardyń biri bolyp esepteledi. 2020 jyly júrgizilgen jańǵyrtý jumystarynan keıin kitaphana keńistigi zamanaýı ári kelýshilerge qolaıly formatta qaıta jabdyqtaldy. Kitaphananyń jalpy aýmaǵy – 410 sharshy metr, kitap qory 40 myńnan asady, al jyl saıynǵy kelýshiler sany – 145 myń adam. Munda erekshe qajettilikteri bar azamattarǵa arnalǵan arnaıy jumys oryndary qarastyrylǵan, elektrondy oqý zaly jumys isteıdi, RFID radıojıilikti sáıkestendirý júıesi engizilgen jáne Almaty-library kitaphanalyq-aqparattyq júıesi qoljetimdi.
Almaty kitaphanalarynyń Rozybakıev kóshesi, 247 úı, 7-blok mekenjaıynda ornalasqan fılıaly 2025 jyldyń sońynda ashyldy. Kitaphana ǵımaratynyń jalpy aýmaǵy – 503 sharshy metr, qorynda shamamen 20 myń kitap bar. Munda joǵary jyldamdyqtaǵy ınternet pen Wi-Fi jelisine qosylǵan kompıýterler ornatylǵan, Almaty-library júıesine qosylǵan, sondaı-aq RFID qaqpalary men ózine-ózi qyzmet kórsetý termınaly bar.
– Kitaphanalardyń táýlik boıy jumys isteý rejımine kóshýi qalanyń taǵy eki aýdan turǵyndaryna kitaphana qyzmetin ózderine yńǵaıly ýaqytta, sonyń ishinde keshki jáne túngi mezgilde paıdalanýǵa jol ashty. Bul óz kezeginde bilim alý, ózin-ózi damytý jáne mádenı demalys úshin qosymsha jaǵdaı jasaıdy, - delingen habarlamada.
Aıta keteıik, búginde Almatyda 30 qalalyq kitaphana jumys isteıdi.
Eske salaıyq, buǵan deıin Almaty mýzeıi aqpan aıynan bastap jańa jumys kestesine kóshkenin jazǵanbyz.