Almatyda tabysqa jetý qupııasy týraly bestsellerdiń qazaq tilindegi nusqasynyń tanystyrylymy ótti
ALMATY. KAZINFORM - Almaty qalasynda Stenford ýnıversıtetiniń professory Ilıa Strebýlaev pen tsıfrlyq strategııalar jónindegi sarapshy Aleks Dangtiń «Venchýrlik oılaý júıesi: sanaly túrde bás tigý arqyly orasan zor tabysqa qalaı jetýge bolady» bestselleriniń qazaq tiline aýdarylǵan nusqasynyń resmı tanystyrylymy ótti. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmeti málim etti.
Іs-shara «Sábı» qaıyrymdylyq qory men Byb Capital venchýrlyq qorynyń qoldaýymen uıymdastyryldy.
«Venchýrlik oılaý júıesi: sanaly túrde bás tigý arqyly orasan zor tabysqa qalaı jetýge bolady» kitabynyń tanystyrylymy venchýrlyq kapıtal, kásipkerlik jáne tsıfrlyq tehnologııalar salasyndaǵy mańyzdy ókilderdi bir alańda jınady. Іs-sharada Qazaqstan Respýblıkasynyń Tsıfrlyq damý jáne aeroǵarysh ónerkásibi mınıstri sóz sóılep, bul kitaptyń qazaq kásipkerleriniń venchýrlyq oılaý júıesin damytýǵa qosatyn úlesiniń zor ekenin atap ótti.
Mınıstr óz sózinde úsh negizgi usynys bildirdi:
«Birinshiden, men Digital Nomads qaýymdastyǵyn qazaq tilindegi tehnıkalyq ádebıetti damytýǵa belsendi qatysýǵa shaqyramyn. Sheteldegi jetekshi tehnologııalyq kompanııalarda jumys istep júrgen bizdiń mamandar tehnıkalyq termınderdi durys aýdaryp, olardyń beıimdelýine aıtarlyqtaı úles qosa alady», — dedi mınıstr.
Sondaı-aq, mınıstr venchýrlyq ınvestıtsııalar naryǵyn damytý maqsatynda arnaıy keńes qurýdy usyndy. Bul keńes jyl saıyn venchýrlyq ınvestorlar, memleket ókilderi, qarjy sektory, startaptar men qorlar, sonymen qatar aımaqtyq elderdiń ókilderi qatysatyn jınalys ótkizedi. Bul is-shara Almatyda ótetin Ortalyq Azııa venchýrlyq forýmynyń aldyndaǵy mańyzdy jıynǵa aınalady dep senedi.
Mınıstr úshinshi usynysynda Astana Hab ınfraqurylymyn tehnıkalyq ádebıetti nasıhattaý maqsatynda qoldaný týraly oı bildirdi.
«Úshinshiden, bizde bar 15 aımaqtyq habty paıdalanyp, qazaq tilindegi tehnıkalyq ádebıetti nasıhattaýǵa bolady. Ásirese ýnıversıtetter arqyly taratýǵa kóńil bólgen jón. Sondaı-aq, venchýrlyq ınvestıtsııalar, tipti shetel naryǵynda bolsa da, kapıtaldy syrtqa shyǵarmaı, elge bilim men tehnologııalar qaıtarýǵa qyzmet etedi», - dedi ol.
Kitap týraly:
Professor Ilıa Strebýlaev venchýrlyq kapıtal jáne bıznestegi tabysqa jetý úshin sheshim qabyldaý tásilderin zertteýge 20 jyldan astam ýaqyt arnady. Ol Amazon jáne McKinsey sekildi tehnologııalyq alpaýyttarda mol tájirıbesi bar Aleks Dangpen birlesip, kásipkerler men ınvestorlardyń tabysty bolýyna kómektesetin toǵyz qaǵıdany ázirledi. Kitap álemdegi ınvestorlar men kásipkerler úshin mańyzdy nusqaýlyqqa aınaldy jáne jaqyn arada qazaqstandyq dúkender sórelerinen tabylatyn bolady.
