Almatyda «Suńqar» tramplıni bos tur ma - sport baqarmasynyń jaýaby

ALMATY. KAZINFORM – Almaty ákiminiń orynbasary Azamat Qaldybekov jáne basqarma basshylary brıfıng ótkizdi.

BAQ ókilderi laýazymdy tulǵalardan «Suńqar» halyqaralyq shańǵy tramplınder kesheni nelikten bos turǵanyn surady. Almaty ákiminiń orynbasary Azamat Qaldybekovtyń jaýabyna sáıkes, bul keshen 2011 jyly Azıada qarsańynda salynǵan. Aýmaǵy - 15 myń m2, onda 8 tramplın bar.

Qalalyq sport basqarmasynyń basshysy Darhan Nurhanuly bul jaýapty tolyqtyrdy.

- Sport basqarmasyna deıin men ákimdikte jumys istedim. Sonda tramplın janynan jıi ótip, nelikten eshteńe ótpeıtini ózime qyzyq bolatyn. Jańa qyzmetke kelgen soń, ózim baryp qarap kórdim. Onda 300 bala sportpen shuǵyldanady. Tipti 10 metrlik tramplın qajettiligi boldy, ol jaqynda berildi. Endi balalar 6 jastan bastap qatysady. Odan bólek tramplınde ulttyq qurama sportshylary daıyndalady. Tramplın sekirýge arnalǵan, odan basqa tásilmen nysandy toltyra almaımyz, - dedi vedomstvo basshysy.

Buǵan deıin Kazinform saýalyna bergen jaýabynda sport basqarmasy «Suńqar» kesheni «Sporttyq nysandar dırektsııasy» JShS-niń senimgerlik basqarýyna berilgenin habarlady.

Eske salaıyq, buǵan deıin Almatyda qandaı sporttyq nysandar salynatynyn jazǵanbyz.