Almatyda sot Qojamjarovtar otbasynyń múlkin buǵattady

ALMATY. KAZINFORM — Almatynyń Medeý aýdandyq soty 2025 jylǵy 17 qarashada burynǵy bas prokýror Qaırat Qojamjarovtyń aǵasy Dýlat Qojamjarovtyń múlkine buǵat saldy.

Bul qujat «Sot kabıneti» saıtynda jarııalanǵan.

Buǵattaý týraly sheshim Qazaqstan Halyq bankiniń ótinishi boıynsha shyǵarylǵan.

Sot qaýlysyna sáıkes, eki jeke tulǵa men olarǵa tıesili tórt kompanııanyń jalpy somasy 2,63 mıllıard teńge kólemindegi barlyq jyljymaly jáne jyljymaıtyn múlki buǵattaldy.

— Sot talapkerdiń suraǵan somasy — 2 550 635 252,63 teńge jáne memlekettik baj somasy 76 524 956 teńge, ıaǵnı barlyǵy 2 627 160 208,63 teńge kólemindegi barlyq jyljymaly jáne jyljymaıtyn múlikti buǵattady. Buǵattalǵan múlikke «Grýppa Kompanıı „Oıl Snab“ JShS, „HILL Resources“ JShS, „HILL Invest“ JShS, „AvtoTechMas Ltd“ JShS, Dýlat Qojamjarov pen Gúlnaz Qojamjarovaǵa tıesili múlikter kiredi, — delingen Medeý aýdandyq sotynyń qaýlysynda.

Qujatta sot 2025 jylǵy 6 qarashada talap boıynsha sheshim shyǵarylǵanyn, biraq sol kezde múlik tizimi men somada qate ketkenin atap ótken. QR Azamattyq protsessýaldyq kodeksiniń 235-babyna sáıkes, sot bul qateni túzep, buǵattalǵan múliktiń tizimin jáne somasyn naqtylap shyqqan.

Eske salaıyq, bıyl qyrkúıekte Ekonomıkalyq qylmysqa jáne sybaılas jemqorlyqqa qarsy kúres agenttiginiń burynǵy tóraǵasy Qaırat Qojamjarovqa qatysty sotqa deıingi tergep-tekserý bastalǵanyn habarlaǵanbyz.

Ol laýazymdyq ókilettin asyra paıdalandy jáne qylmystyq jolmen alynǵan aqshany zańdastyrdy degen kúdikke ilindi.

Al 2025 jylǵy 30 qazanda QR Bas prokýrorynyń orynbasary Ǵalymjan Qoıgeldıev Qaırat Qojamjarovqa qatysty sotqa deıingi tergep-tekserý jaıynda pikir aıtqan edi.