Almatyda soǵys ardageri Qambar Sársenov 100 jasqa toldy

ALMATY. KAZINFORM — Almatylyq Qambar Ámiruly Sársenov Respýblıka kúnimen qatar óziniń 100 jyldyq mereıtoıyn atap ótip jatyr.

«Qyzyl juldyz» ordeniniń kavaleri, birinshi jáne ekinshi dárejeli «Uly Otan soǵysy», «Danq» marapattarynyń ıegeri, Іshki ister organdarynyń aty ańyzǵa aınalǵan ardagerine Almaty qalalyq polıtsııa departamentinde saltanatty túrde qurmet kórsetildi.

«Qambar Ámirulynyń ómiri, eńbek joly, ishki ister organdarynyń damýyna qosqan úlesi, qol jetkizgen jetistikteri, qazaq halqynyń surapyl soǵys jyldarynda kórsetken erligi, batyldyǵy men eren eńbegi bizdiń urpaǵymyzdyń esinde máńgi qalady. Qambar aǵamyzdyń qyry men syryna toly ómir joly jas mamandar úshin úlken ónege ekeni sózsiz. Biz Qambar aǵamyzdaı ardagerlermen maqtanamyz jáne olardyń jasaǵan erlikterin eshqashan umytpaımyz. Qurmetti Qambar Ámiruly, sizge zor densaýlyq, uzaq ǵumyr, taýsylmas qýat tileımiz», — dedi Almaty qalalyq polıtsııa departamentiniń bastyǵy Arystanǵanı Zapparov.

Ardagerdiń júz jasqa tolǵan mereıtoıy kúni maıdangerge arnap polıtsııa qyzmetkerleri men polıtsııa departamenti ansambli solısteriniń oryndaýynda áskerı ánder shyrqaldy.

Respýblıka kúnine oraı uıymdastyrylǵan sharaǵa týǵan kún ıesi, PD basshylyǵy, ardagerler, Qambar Sársenovtiń týǵan-týystary, jeke quram, sondaı-aq QR ІІM Almaty akademııasynyń kýrsanttary qatysty.