Almatyda ishki aýrýlar dárigerleriniń birinshi ulttyq kongresi bastaldy
ALMATY. KAZINFORM – Búgin Almatyda ishki aýrýlar dárigerleriniń birinshi ulttyq kongresi óz jumysyn bastady. Oǵan Qazaqstan, Qyrǵyzstan, Reseı, Ózbekstan, Ázerbaıjan, Grýzııa, Germanııa, Túrkııa, Shvetsııa, Ýkraına jáne basqa da elderiniń tanymal dárigerleri qatysyp jatyr.
Kongress offlaın jáne onlaın formatta uıymdastyryldy. Oǵan 3350 dáriger qatysyp jatyr. Atap aıtar bolsaq, terapevtter, jalpy praktıka dárigerleri, endokrınologtar, kardıologtar, kardıohırýrgtar, reanımatologtar, ınterventsıonıster, nefrologtar, allergologtar, revmatologtar, pýlmonologtar, gematologtar, gastroenterologtar, endoskopıster, orfandyq aýrýlardy baqylaýǵa tartylǵan mamandar.
«Kongress elimizdegi medıtsınalyq kómektiń sapasyn jaqsartýǵa múmkindik beretin bilim men úzdik klınıkalyq tájirıbelerdi shoǵyrlandyrý alańyna aınaldyrýǵa baǵyttalǵan. Oǵan elimizdiń barlyq óńiri men Qyrǵyzstan, Reseı, Ózbekstan, Ázirbaıjan, Grýzııa, Germanııa, Túrkııa, Shvetsııa, Ýkraına memleketteriniń jetekshi mamandary qatysyp jatyr. Dárigerler men ǵalymdar zamanaýı klınıkalyq praktıkanyń ózekti máselelerin, aýrýlardy dıagnostıkalaý men emdeýdegi jańa ǵylymı tásilderdi talqylaýda», - deıdi Kardıologııa jáne ishki aýrýlar ǴZI basshysy Marat Pashımov.
Dárigerlerdiń aıtýynsha, ishki medıtsına mamandarynyń birinshi ulttyq kongresi Qazaqstannyń densaýlyq saqtaý júıesine úzdik halyqaralyq tájirıbelerdi engizýge, terapevt dárigerler men aralas mamandyq dárigerleri jumys barysynyda kezdesetin aýrýlardy dıagnostıkalaý men emdeý sapasyn jaqsartýǵa múmkindik beredi.
Toqtala ketetin jaıt, ulttyq kongress jumysy eki kúnge sozylady. Shara aıasynda, paneldik pikirtalastar, klınıkalyq jaǵdaılardy taldaýmen praktıkalyq sessııalar, sondaı-aq jeńimpazdar marapattalatyn Jas ǵalymdar baıqaýy ótetin bolady.
