Almatyda sheteldik týrıster orta eseppen 5 kún bolady

ALMATY. KAZINFORM - Almaty Tourism Bureau megapolıske keletin týrıster jaıly zertteý nátıjesimen bólisti. Bıýro 1200 sheteldik týrısten saýalnama júrgizgen.

Ulttyq statıstıka bıýrosynyń málimetine sáıkes, osy jyldyń 6 aıynda Almatyǵa 1 070 358 týrıst kelgen. Onyń ishinde ishki týrısterdiń úlesi - 768 myń, al sheteldik qonaqtar - 302 myń.

Almaty týrızm bıýrosy Marketıng jáne saraptama bóliminiń jetekshisi Rýslan Janabaev ishki jáne sheteldik týrısterdiń aıyrmashylyqtaryn ataı otyryp, bıýro júrgizgen zertteý nátıjesimen bólisti.

- Almatyǵa keletin sheteldik qonaqtar negizinen 26-35 jas aralyǵyndaǵy er adamdar. Olardyń 40%-y jalǵyz, 30%-y dostarymen jáne 30%-y otbasymen keledi. Almatyda orta eseppen 5 kún bolady jáne ár kún saıyn orta eseppen 334 AQSh dollaryn jumsaıdy. Týrısterdiń 68%-y demalýǵa, 32%-y iskerlik maqsatta keledi. Jumsalǵan qarajattyń 50%-y jatyn orynǵa ketedi, - dedi ol.

Sondaı-aq, Rýslan Janabaev elimizdiń mádenı astanasyna qydyryp keletin ishki týrısterge de toqtaldy. Onyń aıtýynsha, qazaqstandyqtar sheteldik qonaqtarǵa qaraǵanda 8,7 ese az aqsha jumsaıdy.

- Almatyǵa keletin ishki týrısterdiń orta jasy 18-25 jas aralyǵynda. Olardyń 68%-y týysqandarynyń úıinde toqtaıdy. Orta eseppen qalada 2 kún bolady jáne orta eseppen 38 dollar jumsaıdy. ıAǵnı, sheteldik týrısterge qaraǵanda 8,7 ese az qarajat ketedi. Osy sebepti biz qazir ishki týrısterge qaraǵanda sheteldik qonaqtardy shaqyrýǵa tyrysamyz. Jaı ǵana sheteldik emes, josparly túrde keletin qaltaly týrısterdi shaqyrý boıynsha jumystar júrgizemiz, - dedi bıýro ókili.

Eske salaıyq, buǵan deıin Almatyǵa kelgen sheteldik týrıster qaıtadan týrıstik jarna tóleýi múmkin ekenin jazǵanbyz.