Almatyda sheteldik týrısten 77 myń teńge talap etken taksıst jazalandy

ALMATY. KAZINFORM - Almatyda áýejaıdan shaharǵa jetkizgeni úshin úndistandyq saıahatshydan 77 myń talap etken taksı júrgizýshi 15 kúnge qamaldy. Bul týraly Almaty qalasy Polıtsııa departamenti habarlady.

Úndistandyq bloger Komal Maheshvarı óziniń áleýmettik jelidegi paraqshasynda Almatyda bolǵan jaısyz jaǵdaıǵa shaǵymdanǵan bolatyn.

Onyń aıtýynsha, taksı júrgizýshisi qalaǵa 1 myń teńgege jetkizýge kelisip, keıin soraqy túrde 77 myń teńge talap etken. Biraq Úndistannan kelgen saıahatshy bul aqshany berýge kelispeı, 30 myń teńge tólegen.

Almaty polıtsııa qyzmetkerleri áleýmettik jelidegi aqparatqa sáıkes, Úndistannan kelgen týrıstke jol júrý aqysyn artyq tóletken 27 jastaǵy jigitti ustady.

- Tekserý barysynda azamattyń tıisti qujattarynsyz jeke tasymaldaýmen aınalysqandyǵy, óz qyzmetin azamattardyń mazasyn ala otyra usynǵandyǵy, sondaı-aq ony ustaý kezinde polıtsııa qyzmetkeriniń zańdy talaptaryn oryndamaǵandyǵy anyqtaldy. Almaty qalasynyń mamandandyrylǵan aýdanaralyq ákimshilik sotynyń qaýlysymen quqyq buzýshy 15 táýlikke ákimshilik qamaýǵa alyndy, - dep habarlady qalalyq PD baspasóz qyzmeti.

Eske salaıyq, buǵan deıin Almatyǵa kelgen sheteldik týrıster qaıtadan týrıstik jarna tóleýi múmkin ekenin jazǵanbyz.