Almatyda ishek aýrýlaryn emdeýge arnalǵan ortalyq ashyldy
ALMATY. KAZINFORM — Kardıologııa jáne ishki aýrýlar ǴZI bazasynda ishektiń qabyný aýrýlaryn emdeıtin alǵashqy mamandandyrylǵan ortalyq ashyldy.
Kardıologııa jáne ishki aýrýlar ǵylymı-zertteý ınstıtýtynyń dereginshe, ishektiń qabyný aýrýlary, sonyń ishinde Kron aýrýy jáne oıyq jaraly kolıt búkil álemde jıi kezdesedi. AQSh pen Eýropa elderi sııaqty tabysy joǵary memlekette alty mıllıonǵa jýyq adam ishektiń qabyný aýrýlarynan zardap shegedi.
Qazaqstanda árbir 100 myń adamǵa shamamen 5-10-da ishektiń qabyný aýrýlary jaǵdaıy keledi dep esepteledi jáne bul kórsetkish, ásirese dıagnostıkanyń jaqsarýyn jáne aýrýlar týraly habardarlyqtyń artýyn eskere otyryp, óse berýi múmkin.
Qysqa ishek sındromy - sırek kezdesetin, biraq aýyr jaǵdaı, ádette jaraqattar, aýrýlar nemese Kron aýrýy sııaqty ishektiń qabyný aýrýlarynyń asqynýlary saldarynan ash ishektiń mańyzdy bólikterin hırýrgııalyq alyp tastaǵannan keıin paıda bolady.
Qazir elimizde qysqa ishek sındromyna shaldyqqan naýqastardyń biryńǵaı statıstıkasy joq, óıtkeni QІS dıagnozy joǵary mamandandyrylǵan ortalyqtar jaǵdaıynda kúrdeli dıagnostıkany qajet etedi.
Ortalyq joǵary sapaly dıagnostıkany, zamanaýı emdeý baǵdarlamalaryn jáne psıhoáleýmettik qoldaýdy qosa alǵanda, patsıentterdiń osy sanatyna mamandandyrylǵan kómek kórsetedi. Negizgi baǵyttardyń biri klınıkalyq tamaqtaný máseleleri boıynsha konsýltatsııalyq kómekti qamtıtyn nýtrıtıvtik túzetý bolady.
«Ortalyqtyń negizgi mindetteri - ІQA jáne QІS patsıentteriniń ómir súrý sapasyn arttyrý, sondaı-aq boljamdy jaqsartý jáne yqtımal asqynýlardyń aldyn alý. Bizdiń ortalyqtyń biregeıligi - dıagnostıka úshin zamanaýı tehnologııalardyń jáne terapııanyń úlken arsenalynyń bolýynda ǵana emes, sonymen qatar patsıentterge ońaltý jáne emdeý úshin qyzmetterdiń tolyq spektrin alýǵa múmkindik beretin kópsalaly toptyń bolýynda. Biz árbir patsıentke sapaly kómek, sondaı - aq tolyqqandy ómirge oralý úshin qajetti qoldaý berýge daıynbyz», - dep atap ótti Kardıologııa jáne ishki aýrýlar ǴZI Basqarma tóraǵasynyń ǵylymı-klınıkalyq jáne ınnovatsııalyq qyzmet jónindegi orynbasary Jámılá Qaıbýllaeva.
