Almatyda shatyrdyń ústine salynǵan úı buzyla ma

ALMATY. KAZINFORM – Almatyda 9 qabatty úıdiń tóbesinde salynǵan nysan buzylýy múmkin.

– Almaty qalasynyń Qala qurylysyn baqylaý basqarmasy Almaly aýdany №2 aýdandyq sotyna nysanǵa qatysty quqyq belgileıtin qujattardy joıý jáne ony súrý týraly talap aryz joldady. Qazirgi ýaqytta sot isi júrip jatyr, – dep habarlady qalalyq ákimdikten.

Osyǵan deıin áleýmettik jelide Jumalıev kóshesiniń boıynda ornalasqan 9 qabatty úıdiń shatyryndaǵy erekshe baspananyń vıdeosy taraǵan bolatyn. 

Keıin ákimdik bul nysannyń 2012 jyly zańdy negizde paıdalanýǵa berilgenin túsindirdi. Alaıda jelidegi qyzý talqydan keıin qala qurylysyn baqylaý basqarmasy ǵımarattyń quqyqtyq mártebesin rastaý úshin arhıvten qujattardy kóterýge ýáde bergen bolatyn.

Eske salaıyq, byltyr Almatynyń taý bókterinde zańsyz salynǵan 52 nysan anyqtalǵan bolatyn. 

Budan bólek, Almatyda kóp jyl boıy qurylysy bitpegen nysandar qashan buzylatyny týraly jazǵanbyz.