Almatyda saýnada balalar lagerin uıymdastyrǵandar sottaldy
ALMATY. KAZINFORM — Almaty qalasy Medeý aýdanynyń № 2 sotynda almatylyq oqýshylardyń demalýǵa jazǵy lagerge emes, saýnaǵa jiberý isi boıynsha qylmystyq is qaraldy.
M. Almaty qalasy bilim basqarmasynyń memlekettik satyp alý jónindegi bas mamany bola tura, N-dan para alý maqsatynda onyń «B» JShS jáne «A» JShS kompanııalaryn erekshe, jetim jáne ata-ana qamqorlyǵynsyz qalǵan balalarǵa arnalǵan jazǵy demalysty uıymdastyrý qyzmetin memlekettik satyp alý konkýrsynyń jeńimpazy dep tanyǵan.
«2023 jyldyń jazynda N. „J“ MK-nyń 50 balasyn óziniń jeke mektebine ornalastyrǵan. Sol kúni ol balalar lagerin uıymdastyrý syltaýymen „D“ fıtnes-ortalyǵy bar monsha keshenine 300 balany ornalastyrǵan. Balalardyń ata-anasy jáne „J“ MK qyzmetkerleri jeke mektep pen fıtnes-saýyqtyrý kesheni bar monsha kesheniniń balalardyń demalys ornyna aınalǵanyn bilip, balalaryn úıine alyp ketken. M. jáne N-nyń qylmystyq áreketinen balalardyń jáne erekshe kútimdi qajet etetin balalardyń jazǵy demalysy buzylyp, balalar qolaısyz jaǵdaıda beıtanys adamdardyń arasynda qalǵan», — dep habarlady Almaty qalalyq soty taratqan habarlamada.
Sottalýshy M. kinásin moıyndamaı, sottan ony aqtaýdy surady. Sottalýshy N. óz kinásin tolyq moıyndap, sottan bas bostandyǵynan aıyrmaıtyn jaza taǵaıyndaýdy surady.
Prokýror sottalýshy M-ny — 7 jylǵa, N-ny — 5 jylǵa bas bostandyǵynan aıyrýdy surady.
«Sot úkimimen M. óziniń qyzmet babyn paıdalanyp, asa iri mólsherde para alýǵa árekettengeni úshin kináli dep tanylyp, oǵan 6 jyl merzimge bas bostandyǵynan aıyrý jazasy taǵaıyndaldy. Ol budan bylaı memlekettik qyzmet atqara almaıdy. N. asa iri mólsherde aldaý jáne senimge qııanat jasaý arqyly alaıaqtyq áreketin jasaǵany úshin kináli dep tanylyp, 5 jyl merzimge bas bostandyǵynan aıyryldy» dep habarlady Almaty qalalyq sotynyń baspasóz qyzmeti.
Sottalýshylardyń kinási is boıynsha jınalǵan dáleldemelermen, sottalýshy N-nyń moıyndaýymen, kýálardyń aıǵaqtarymen, mamandardyń qorytyndysymen jáne jasyryn tergeý áreketiniń nátıjesimen dáleldendi.
Jaýapkershilikti jeńildetetin mán-jaı retinde M. men N-nyń birinshi ret sottalyp otyrǵany, sottalýshy M-nyń asyraýynda kámeletke tolmaǵan eki kishkentaı balasy bolýy, N-nyń jasaǵan qylmysyna shyn júrekten ókinýi, kinásin moıyndaýy boldy.
Jaýapkershilikti aýyrlatatyn mán-jaı joq.
Úkim zańdy kúshine engen joq.
Eske salsaq, ótken jyly jazda almatylyq oqýshylardy demalýǵa jazǵy lagerge emes, saýnaǵa jibergen bolatyn.
Keıin Almaty prokýratýrasy saýna ǵımaratynda balalar lagerin uıymdastyrý isi boıynsha tergeý bastady.
Sondaı-aq Almaty qalasynyń máslıhat depýtattary saýnadan balalar lagerin ashqan kásipker utyp alǵan tenderdiń quny 107 mln teńge ekenine kóz jetkizgen edi.