Almatyda Sátbaev kóshesiniń bir bóligi eki kúnge jabylady
ALMATY. KAZINFORM – Almaty qalasyndaǵy iri kósheniń biri - Q. Sátbaev kóshesi eki kúnge jabylady.
Aýylsharýashylyǵy jármeńkesin ótkizýge baılanysty Ýálıhanov kóshesinen Dostyq dańǵylyna deıingi ýchaskedegi Sátbaev kóshesiniń bir bóligi 11 qazan saǵat 20:00-den 13 qazan saǵat 20:00-ge deıin jabylady.
Budan basqa, №45, №95 jáne 121 avtobýstardyń baǵytyna ózgerister engiziledi. Jabylatyn ýchaskeni aınalyp ótý Abaı dańǵyly boıynsha júrgiziletin bolady.
Almaty ákimdiginiń málimetinshe, 12-13 qazan kúnderi saǵat 8.00-den 17.00-ge deıin keńeıtilgen aýylsharýashylyq jármeńkesi ótedi. Oǵan Almaty men Abaı oblystarynyń fermerleri qatysady.
«Jármeńkede 50-tan astam ónim – et-sút, jemis-kókónis, shujyq ónimderi, ósimdik jáne janýar maılary jáne t.b. usynylady. Ónimniń jalpy kólemi – 300 tonna. Onyń ishinde et ónimderi – 100 tonna, jemis, kókónis ónimderi – 100 tonna, sút ónimderi – 30 tonna, balyq ónimderi – 10 tonna, basqalary – 60 tonna», - dep habarlady ákimdiktiń baspasóz qyzmeti.
Jármeńke ótetin oryn – Sátbaev kóshesiniń boıymen Ýalıhanov kóshesi men Dostyq dańǵyly aralyǵynda.
