Almatyda sarapshylar shamadan tys avtokólikti azaıtý joldaryn talqylady
ALMATY. KAZINFORM – Almatyda Mılan men Máskeý sarapshylarynyń qatysýymen «Artyq kóliktiń ábigeri: jańa sheshimder izdeý» taqyrybynda dóńgelek ústel ótti.
Almatynyń damý ortalyǵy janyndaǵy jobalyq ofıstiń «Kólik júıesin damytý» bazalyq baǵytyn iske asyrý tobynyń jetekshisi Artýr Shahbazıanyń aıtýynsha, sońǵy eki jylda qalada tirkelgen avtokólikterdiń sany 24% ósti, al 2030 jylǵa qaraı bul kórsetkish 40% jetýi múmkin.
«Búgingi tańda avtokólik aýanyń lastanýynyń negizgi kózi bolyp tabylady jáne eger biz qalada turýdyń jaılylyyǵn qalasaq, jeke avtokólikterdiń sanyn azaıtý qajet. Ol úshin Almatyda 2030 jylǵa deıin qoǵamdyq kólikte júrý sanyn 64%-ǵa ulǵaıtý, sondaı - aq aqyly turaq aımaǵyn keńeıtý jónindegi sharalardy kózdeıtin kólik qańqasynyń Sheberlik - jospary qabyldandy», - dedi spıker.
Kólikti damytý salasyndaǵy táýelsiz sarapshy Elena Erzakovıchtiń pikirinshe, qarapaıym azamattarǵa ǵana emes, sheshim qabyldaıtyn saıasatkerlerge de aqyly turaqtar men ekologııa arasyndaǵy baılanysty belsendi túrde túsindirý qajet.
«Aqyly avtoturaq aımaqtarynyń sany artqannan keıin onyń quny artady, qalada kólikter azaıady jáne sáıkesinshe aýa sapasy jaqsarady. Bul adamdardyń minez-qulyq ádetterin ózgertedi, olar jeke kólikpen júrý kerek pe, eger qajet bolsa, qysqa merzimge barý kerek pe dep oılaıdy. ıAǵnı, qarapaıym tilmen aıtqanda, avtomobılderdiń sanyn azaıtý kerek», - dedi Elena Erzakovıch.
Óz kezeginde, Mılan qalasynyń kólik júıesiniń turaqty jospary boıynsha sarapshylar keńesiniń múshesi Federıko Parolotto búginde trafıkti baqylaýdyń jańa ádisterin ázirleýdiń qajeti joq dep sanaıdy, Parıj, London, Mılan sııaqty qalalardyń tájirıbesi óziniń tıimdiligin kórsetti.
«Bul aqyly avtoturaq aımaǵyn keńeıtý, belgili bir aýdandarǵa kóliktiń kirýine shekteýler engizý, elektromobılderge jeńildikter jáne t.b. Mashınanyń kóptegen problemalar týdyratynyn túsiný mańyzdy, bul janarmaı quıý, jýý, tehnıkalyq qyzmet kórsetý jáne eń bastysy, ol úlken kólemdegi qoǵamdyq keńistikti alady. Sondyqtan qansha jol salynsa da, keptelis máselesin sheshý múmkin emes. Shyǵýdyń jalǵyz joly – qatań shekteýler men qoǵamdyq kólikti damytý», - dep atap ótti sheteldik sarapshy.
Tanymal ýrbanıst Arkadıı Gershman Stokgolmniń mysalyn keltirdi, onda aqyly jol júrý aqysy jáne turaq quny joǵary.
«Bastapqyda qala turǵyndary qarsy boldy, biraq bul sharalardyń tıimdiligin sezingende, kópshiligi óz oılaryn ózgertti. Óz qalańyzda kún saıyn 10 baldyq keptelisterdi kórý qalypty jaǵdaı emes. Sondyqtan jeke avtokólikterge shekteýler engizý, qoǵamdyq kólikti damytý, velosıped jolaqtaryn qurý árqashan oń nátıje beredi», - dep atap ótti ýrbanıst.
Máskeýden kelgen kólik sarapshysy Sergeı Andreıkın aqyly avtoturaqtar qalanyń qajettilikterine qarajat jınaý úshin emes, orynnyń aınalymyn arttyrý úshin engiziletinin atap ótti.
«Kezbe trafıkti azaıtý jáne kólik sanyn retteý úshin avtoturaq ortalyǵynda kóp bolýy ári quny qymbat bolýy tıis. Mysaly, Almatyda tarıf óte tómen. Árıne, jaqyn mańdaǵy úılerdiń turǵyndary úshin rezıdenttik abonementter qarastyrylýy kerek, biraq olardyń sany da shekti bolǵany jón», - dedi Sergeı Andreıkın.
Dóńgelek ústelge qatysýshylar Almaty erte me, kesh pe qymbat avtoturaq tarıfine jáne jeke kólikter úshin basqa da shekteýlerge qol jetkizedi, biraq munyń bári qoǵamdyq kóliktiń belsendi damýymen qatar júrýi tıis degen qorytyndy jasady.
