Almatyda mopedterdiń qatysýymen 233 jol apaty boldy
ALMATY. KAZINFORM – Almatyda jyl basynan beri mopedshilerdiń kesirinen 233 jol apaty bolyp, 243 adam zardap shekti. Bul týraly Óńirlik kommýnıkatsııalar qyzmetinde ótken baspasóz máslıhatynda qalalyq polıtsııa departamentiniń ókili Saltanat Ázirbek málim etti.
Spıkerdiń sózinshe, «Qaýipsiz jol» jedel-aldyn alý is-sharasy aıasynda tártip saqshylary joldaǵy qaýipsizdikti qamtamasyz etý úshin belsendi jumys istep jatyr. Ásirese moped pen motokólik ıeleri erekshe nazarǵa alynǵan.
Saltanat Ázirbek moped júrgizetinder tıisti sanattaǵy júrgizýshi kýáligin, memlekettik tirkeý nómirin, tehnıkalyq pasport pen saqtandyrý polısin alyp, kóligin tehnıkalyq baıqaýdan ótkzýi tıis ekenin eske saldy.
– Bulardy zańdy oryndaý úshin ǵana emes, adam ómirin aman saqtap qalý úshin de qolǵa alyp otyrmyz. Bul jol apatyn azaıtyp, tártipti kúsheıtýge baǵyttalǵan. Túsindirme jumysy júrgizilip jatsada, zań buzatyndar áli de azaımaı otyr. Sońǵy aptada Almatyda osyndaı 1,5 myńnan astam zań buzýshylyq tirkeldi, - dep atap ótti ol.
Budan bólek, Almatyda osy mopedshilerdiń kesirinen 233 jol apaty bolyp, 243 adam zardap shekken. 500-ge jýyq moped aıyp turaǵyna qoıylǵan.
– Jolda abaılap júrmese bolmaıdy. Ol moped, mashına dep eshkimdi bólmeıdi. Sondyqtan jol júrý erejesin saqtaý – árkimniń azamattyq boryshy bolýy tıis. Qazir 12 myńnan astam adam kólik quralyn zańdastyryp, memlekettik tirkeý nómirin, júrgizýshi kýáligin alyp, saqtandyrý polısin rásimdep úlgerdi, - dep qosty Saltanat Ázirbek.
Buǵan deıin mopedterin tirkemegenderge qandaı jaýapkershilik kózdelgeni týraly jáne moped ıeleri endi A1 sanatyndaǵy júrgizýshi kýáligin alýǵa mindettelgeni týraly jazǵan edik.