Almatyda monsha kesheninde iri órt boldy

ALMATY. KAZINFORM – Almatyda monsha kesheninde bolǵan órt sóndirildi.

Tótenshe jaǵdaı mınıstrliginen habarlaǵandaı, órttiń eki qabatty aǵash saraıǵa jáne kórshi ǵımarattarǵa taralýyna jol berilmedi.

«Naqtylanǵan aqparat boıynsha órt alańy 380 sharshy metrdi qurady. Qaza tapqandar men zardap shekkender joq. Órttiń sebebi anyqtalýda», - dep habarlady QR TJM baspasóz qyzmeti.

Eske salaıyq, búgin keshki saǵat 18:00-de Almatylyq órt sóndirýshiler joǵary dáreje boıynsha Medeý aýdany, Ospanov kóshesi, 85/77 mekenjaıynda ornalasqan monsha kesheninde shyqqan órtke jiberildi. «Qarbalas ýaqytta» taýly aımaqqa aparatyn joldaǵy jol keptelisi órt sóndirý tehnıkasyna kedergi týdyrǵan.

Barlaý barysynda, órt sóndirýshiler eki aǵash qurylysy, ishinara úshinshisi de janyp jatqanyn anyqtady, ottyń kórshi aǵash kottedjderge taralý qaýpi týyndady. Nysan ákimshiliginiń aıtýynsha, kelýshiler bolmaǵan.

«Dereý jedel shtab ornalastyrylyp, órt oqpandary engizildi, aralas tásilmen sýdyń úzdiksiz berilýi qamtamasyz etildi. Polıtsııa departamentiniń qyzmetkerleri órt bolǵan jerdi qorshaýdy uıymdastyrdy. Kez kelgen mınýtta monsha kesheniniń janynda turǵan aǵash qurylystar órtenýi múmkin edi. Órtti sóndirýge jeke quramnan 77 adam, 19 birlik tehnıka, sondaı-aq qalanyń ózara is-qımyl qyzmeti jumyldyryldy», - dep atap ótti QR TJM-da.