Almatyda mereke men demalys kúnderi qaıda barýǵa bolady
ALMATY. KAZINFORM - Almatyda 9, 10, 11 mamyr kúnderi merekelik is-sharalar bolady.
9 mamyr kúni 28 gvardııashy-panfılovshylar saıabaǵynda Uly Jeńistiń 80 jyldyǵyna arnalǵan aýqymdy kontserttik baǵdarlama ótedi. Sol kúni saǵat 9:30-da Qanat Ahmetov jetekshilik etetin Memlekettik úrmeli orkestrdiń qatysýymen Máńgilik alaýǵa gúl shoqtary qoıylady. Ardagerlerge dala ashanasynan taǵam usynylady, sondaı-aq olar úshin arnaıy shatyrda jeke kontserttik baǵdarlama uıymdastyrylady.
Saıabaqta almatylyqtar men qala qonaqtaryna arnap saǵat 09:45-ten 21:00-ge deıin basty sahnada mýzyka úzilissiz shyrqalady. Kúndizgi baǵdarlama Almaty qalasy ákiminiń estradalyq-sımfonııalyq orkestri «AlJazz Symphony» saltanatty óner kórsetýimen bastalady.
Baǵdarlamaǵa Qazaqstannyń tanymal ánshileri: Tólegen Rahymbaev, Venera Alpysbaeva, Oleg Tatamırov, Alekseı Tımofeev, Tolqyn Zabırova, Bereke Eńkebaeva, Baqtııar Taılaqbaev, Igor Blagodarnyı, Maqsat Samatov, sondaı-aq, Art Classic, Il Canto, La Bella vokaldy ansamblderi jáne basqalar qatysady.
Mýzykalyq estafetany «Qasymnyń ánderi-aı» kontserti, Qazaqstannyń halyq ártisi Talǵat Kúzembaev pen «General» tobynyń jeke kontsertteri jalǵastyrady.
Saǵat 19:00-den 21:00-ge deıin kórermenderge qazaqstandyq estrada juldyzdarynyń qatysýymen keshki kontsert usynylady. Il Canto jáne La Bella kvartetteri «Smýglıanka» men «Katıýsha» ánderin oryndaıdy, Arkaım dýeti, «Alataý serileri» jáne «Jumyr qylysh» ansamblderi ulttyq áýenderdi shyrqaıdy. Saı Mahambet, Erjan Maksım, Nurjan Kermenbaev, Jubanysh Jeksenuly jáne basqa da ánshilerdiń jeke oryndaýlarynda túrli ánder usynylady. Keshti «KeshYOU», JasStars, «Aldaspan» jáne «Jigitter» toptarynyń óneri túıindeıdi.
Sonymen qatar saǵat 19:00-de Kóktóbe telemunarasynda Uly Otan soǵysynyń ataqty qazaqstandyq batyrlarynyń esimderi jazylǵan mýltımedııalyq Jeńis kúnine arnalǵan quttyqtaý bastalady.
Jeńis ánderi 10 jáne 11 mamyr kúnderi de 28 gvardııashy-panfılovshylar saıabaǵynda ashyq aspan astynda shyrqala beredi.
10 mamyr kúni saǵat 11:00-den 15:00-ke deıin Dańq eskertkishiniń janyndaǵy sahnada «Sazgen sazy» ansambli ulttyq kúılermen, «Arqaıym» etno-toby, «MýzArt Life» ujymy, «Jeti ǵajaıyp» teatry, Sulýshash Nurmaǵanbetova, Ǵarıfa Igisinova, Erkesh Hasenov, Qazybek Ádikeı, Aqylbek Jemeneı, Óktem Altaev, Dálel Ýáshev jáne Indıra Elemes óner kórsetedi.
11 mamyr kúni saǵat 12:00-de «Eshkim de umytylmaıdy, eshnárse de umytylmaıdy!» atty kontsertpen merekelik baǵdarlama jalǵasady. Sahnaǵa halyq aspaptar ansambli «Sazgen sazy», sondaı-aq, Saıat Nurǵazın, Baýyrjan Mýsın jáne Jeńis Erjanov shyǵady. Saǵat 13:00-de «Asyl» toby óner kórsetedi, al «Almaty áýenderi» ártisteri Talǵat Kúzembaev, Dáýren Baıbory, Erık Tólenov, Tahmına Áshimbekova jáne Qazybek Ádikeımen dýette sońǵy bolyp óner kórsetedi.
Eske salaıyq, buǵan deıin Almatyda 9 mamyr kúni birqatar kóshe ýaqytsha jabylatynyn jazǵanbyz.