Almatyda mektep oqýshylary qalaı durys tamaqtanýdy úırenip júr

ALMATY. KAZINFORM — Jýyrda Almatynyń bes mektebinde «Kókónis aıy» atty bilim berý baǵdarlamasy ótti. 

Joba qala Bilim basqarmasynyń jáne Qalalyq ǵylymı-ádistemelik jańa bilim berý tehnologııalar ortalyǵynyń (QǴÁJBTO) qoldaýymen júzege asyrylyp, osy ýaqytqa deıin 2700-den astam balany qamtydy. Baǵdarlama mektep oqýshylarynyń durys tamaqtanýǵa degen qyzyǵýshylyǵyn qalyptastyrýǵa baǵyttalǵan.

«Kókónis aıy» qalaı ótti

Statıstıkaǵa sáıkes, Qazaqstandaǵy ár besinshi bastaýysh synyp oqýshysy artyq salmaqtan zardap shegedi. Durys emes tamaqtaný ádetteri bala kezden qalyptasyp, ómir boıy saqtalady. Mektep oqýshylarynyń tamaqtaný tártibin jaqsartý jáne durys tamaqtanýǵa qyzyǵýshylyǵyn arttyrý maqsatynda kásibı ádiskerler men nýtrıtsıologtar arnaıy «Kókónis aıy» baǵdarlamasyn ázirledi. Ol balalarǵa kókónisterdiń tek paıdaly ǵana emes, sonymen qatar qyzyqty ekenin túsinýge kómektesedi.

Osylaısha, bastaýysh synyp oqýshylary pikir kóshbasshylarynyń kómegimen jáne oıyn mehanıkasyn paıdalana otyryp:

· tanymdyq sabaqtarǵa qatysty;

· túrli-tústi jumys dápterlerimen jumys istedi;

· oıyndar men praktıkalyq tapsyrmalar arqyly kókónisterdiń paıdaly qasıetterin zerttedi;

· ata-analarymen birge tamaq daıyndap kórdi;

· ártúrli kókónisterdi qandaı túrde jeýdi unatatynyn anyqtap, olardy turaqty túrde tutynýǵa daǵdylandy.

Baǵdarlamaǵa qatysa otyryp, balalar ózderiniń dám talǵamdaryn jaqsyraq tanyp, paıdaly taǵamdar daıyndaýdy úırendi jáne kókónisterdi turaqty túrde as mázirine qosýǵa daǵdylandy. Al qorytyndy sabaqta oqýshylar óz bilimderimen jáne jaǵymdy áserlerimen bir-birimen jáne muǵalimderimen bólisti. Barlyǵy dıplomdar men estelik syılyqtar aldy.

Pılottyq iske qosý nátıjeleri

Aıta ketý kerek, joba Almatyda pılottyq rejımde 2023 jyldyń qarasha aıynda bastaldy. Jobanyń iske qosylǵan sátinen bastap ońtústik astananyń segiz mektebinen 1200 bala qatysty. Baǵdarlamanyń aldynda jáne aıaqtalǵannan keıin ata-analar men oqýshylar arasynda saýalnama júrgizildi. Qatysýshylardyń basym bóligi durys tamaqtanýǵa degen kózqarastarynyń oń ózgergenin atap ótti.

Nátıjeleri tańǵalarlyq boldy:

· kókónisterdi balalarǵa ońaı jegizetin ata-analar sany 14%-ǵa artty;

· kókónisterdi «óte jaqsy kóremin» degen balalar sany úsh ese kóbeıdi;

· 70% bala ata-anasynan kókónisterdi jıi daıyndaýdy suraı bastady;

· 73% kún saıyn kókónis jeýge daǵdylandy.

2024-2025 oqý jyly

Aıta keterligi, «Kókónis aıy» Almatynyń qazaq jáne orys tilderinde bilim beretin bes mektebinde ótti. Atap aıtsaq, № 52, № 108, № 157, № 34 jáne № 94 mektepterinde. Bul jobanyń aıasynda 1500-den astam oqýshy kókónisterdi tamaqtaný ratsıonyna qosýdyń mańyzdylyǵy týraly bilim aldy. Sondaı-aq, barlyq oqý materıaldary qatysýshylarǵa tegin usynylǵanyn atap ótken jón.

— Balalar dám sezimine anaǵurlym sezimtal keledi. Jańa ónimge, mysaly, kókóniske beıimdelý úshin balaǵa onymen shamamen 10-15 ret tanysý qajet. Sondyqtan biz bala kezden qalyptasqan durys tamaqtaný ádetteri olardyń bolashaqta belsendi ári baqytty bolýyna kómektesetinine senemiz. «Kókónis aıy» — bul tek aqparattyq-tanymdyq joba ǵana emes, sonymen qatar otbasylardy óz ratsıonyn ózgertip, ony teńdestirilgen ári paıdaly etýge yntalandyratyn bastama, — dep túıindedi uıymdastyrýshylar ókili Irına Barbolına.

Osy jyldyń sáýir aıynda «Kókónis aıy» Almaty qalasyndaǵy qazaq jáne orys tilderinde bilim beretin eki mektepte ótedi.

Aıta ketelik Densaýly saqtaý mınıstrligi medıtsına jáne bilim berý uıymdarynda tamaqtaný standarttaryn jańartýǵa arnalǵan buıryq jobasyn kópshilik talqylaýyna shyǵarǵan edi.