Almatyda MÁMS esebinen qandaı qymbat otalar jasalady

ALMATY. KAZINFORM – Megapolıste jyl saıyn MÁMS esebinen myńdaǵan qymbat operatsııalar jasalady. Bul týraly “Áleýmettik medıtsınalyq saqtandyrý qorynyń” KEAQ Almaty qalasy boıynsha fılıalynyń baspasóz qyzmeti habarlady.

- Ótken jyly almatylyq dárigerler MÁMS qarajaty esebinen 7 myńnan astam joǵary tehnologııaly operatsııa jasaǵan. Oǵan Qordan 21,7 mlrd teńge tólengen bolsa, 2024 jyly mundaı otalarǵa 25 mlrd teńge bólindi, - dep habarlady qordan.

ÁMSQ baspasóz qyzmetiniń málimetine sáıkes, Almatyda MÁMS esebinen jasalatyn eń qymbat ota túrleri:

- Júrekke qosalqy ımplant júıesin ornatý, quny – 74,8 mln teńge.
- Allogendik gemopoetıkalyq diń jasýshalaryn almastyrý, quny – 16,3 mln teńge.
- Baýyr almastyrý, quny – 8,3 mln teńge. Byltyr Almatyda 27 naýqas MÁMS esebinen baýyr almastyrǵan.
- Avtomatty kardıoverter nemese defıbrıllıator ornatý, quny – 8 mln teńge.
- Elektromagnıtti estý apparatyn ornatý, quny – 7,3 mln teńge.
- Aorta qaqpaqshasyn almastyrý, quny – 6,5 mln teńge.
- Bas pen moıyn tamyrlary embolızatsııasy (nemese okklıýzııa), quny – 5,8 mln teńge. Ótken jyly almatylyq neırohırýrgter osyndaı 586 ota jasaǵan.
- Ekstrakorporaldy uryqtandyrý (EKU), quny – 1,2 mln teńge. Jyl saıyn elimizde MÁMS esebinen ekstrakorporaldy uryqtandyrýǵa 7000 kvota bólinedi, onyń 3241-i – Almatyǵa tıesili.