Almatyda laı kóshkini qaýpi bar ýchaskeler nyǵaıtylyp jatyr

ALMATY. KAZINFORM — Erbolat Dosaev Medeý aýdanynyń turǵyndarymen kezdesý barysynda taý bókterindegi kóshkinderdiń aldyn alý boıynsha qabyldanyp jatqan sharalar týraly aıtyp berdi.

Almaty ákiminiń aıtýynsha, byltyr Medeý aýdanynda 82 ýchaske egjeı-tegjeıli zertteldi.

— Medeý aýdanynyń taý alaptary turǵyndarynyń qaýipsizdigin qamtamasyz etýge erekshe kóńil bólinedi. Ótken jyldyń qazan aıynda qala rezervinen 1,5 mlrd teńge bólinip, 17 turaqsyz ýchaskeni nyǵaıtý bastaldy. Jumysty bıyl jazda aıaqtaý josparlanyp otyr, — dedi Erbolat Dosaev.

Budan bólek, 28 jer teliminiń ıelerine topyraqtyń shaıylýyn boldyrmaý jáne sý burý qajettiligi boıynsha sarapshylardyń usynymdary berildi. Sondaı-aq 16 ýchaskede topyraqtyń buzylýyn, releftiń deformatsııasyn jáne yqtımal kóshkinderdi boldyrmaý úshin jumystar júrgizilip jatyr.

— Olımpııskaıa kóshesinde, 2023 jyldyń aqpan aıynda kóshkin júrgen jerde 1 500 sharshy metr taý bókteri tazartyldy, 900 tekshe metr gabıondy qurylym ornatyldy, 770 metr nóserli káriz naýalary salyndy, 780 sharshy metr trotýar tastary tóseldi, 2 700 sharshy metr aýmaqty qamtıtyn arqandy-torly júıe ornatý jumystary aıaqtaldy, — dedi ol.

Eske salaıyq, byltyr 8 aqpan kúni Medeý aýdanynyń «Taý samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy. 

Keıin Almaty qalasy tótenshe jaǵdaılar departamenti men respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty. 

Osyǵan deıin Almatyda qaı jerlerge qurylys júrgizýge tyıym salynatyny týraly jazǵanbyz.