Almatyda lańkestikke qarsy jattyǵý ótip jatyr

Búgin Almaty qalasynyń Túrksib aýdanynda ornalasqan №8 qalalyq klınıkalyq aýrýhana aýmaǵynda 6:00-den 14:00-ge deıin lańkestikke qarsy josparly oqý-jattyǵý ótip jatyr, dep habarlaıdy Kazinform. 

Almaty qalasynyń lańkestikke qarsy kúres boıynsha jedel shtabynyń málimetinshe, oqý-jattyǵýdyń maqsaty – adamdar kóp jınalatyn jerlerde lańkestik sıpattaǵy qaýip-qater týyndaǵan jaǵdaıda ózara is-qımyl jasaý daǵdylaryn pysyqtaý. Jattyǵý mindetteri lańkestik aktisiniń jolyn kesý mehanızmin jetildirýge baǵyttalǵan.

Sonymen qatar oqý-jattyǵý kezeńinde shekteý sharalary qarastyrylǵan.

«Osyǵan baılanysty biz azamattardy bolyp jatqan oqıǵalarǵa túsinistikpen qaraýǵa, tynyshtyq pen qaýipsizdik sharalaryn saqtaýǵa, oqý-jattyǵýlarǵa qatysqan memlekettik qyzmetkerlerdiń zańdy talaptaryn saqtaýǵa shaqyramyz. «Ákimshilik quqyq buzýshylyq týraly» QR Kodeksiniń 443-babyna sáıkes, qoǵamdyq tártipti qamtamasyz etýge qatysýshy tulǵanyń zańdy talabyna baǵynbaý ákimshilik jaýapkershilikke ákeletinin eskertemiz», - dep habarlady jedel shtabtyń ókilderi.