Almatyda qurylys qoımasy órtendi
Almatyda qurylys materıaldary jáne lak-boıaý ónimderi turǵan qoımadan órt shyqty, dep habarlaıdy Kazinform.
Almaty qalalyq Tótenshe jaǵdaılar departamentiniń málimetinshe, 14 qańtar kúni saǵat 20:25-te órt sóndirý bólimsheleri Almaly aýdany, Áýezov kóshesi, 2/8 a mekenjaıyna shaqyrtýǵa shyqty.
Alǵashqy órt sóndirý bólimsheleri kelgen sátte qurylys materıaldary jáne lak-boıaý ónimderi bar qoımanyń 500-den astam sharshy metr aýmaǵy janyp jatqanyn anyqtady.
«Órttiń kórshiles ornalasqan qoımalarǵa taralý qaýpi týyndady. Órtti sóndirý jumystaryn qoımadaǵy tez janǵysh zattar (bıtým, lak-boıaý) qıyndatty. Dereý jedel shtab pen úsh órt sóndirý ýchaskesi qurylyp, negizgi basym mindetter aıqyndaldy. Ony sóndirý barysynda qyzyp turǵan temir qoımadan qaýipsiz jerge 3 ottegi jáne 4 gaz ballony shyǵaryldy»,- dep habarlady qalalyq TJD-dan.
Órt túngi 22:34-te oqshaýlanyp, 22:50-de tolyq sóndirildi.
Oǵan 21 birlik tehnıka men 100-den astam adam jumyldyryldy.
Ottyń shyǵý sebebi anyqtalyp jatyr. Qaza bolǵandar men zardap shekkender joq.
