Almatyda kúnine 200 adam qabyldaıtyn dárigerlik ambýlatorııa ashylady
ALMATY. KAZINFORM — Almatynyń Alataý aýdanynda bıyl 200 kelýshige arnalǵan medıtsınalyq-sanıtarlyq kómek ortalyǵy paıdalanýǵa beriledi. Bul týraly qala basshysy Erbolat Dosaev aýdan turǵyndarymen kezdesý barysynda málimdedi.
Jańa bes qabatty MSAK ortalyǵy №25 qalalyq emhananyń fılıaly bolady. Ol jaqyn mańdaǵy shaǵyn aýdandardyń 18 myń turǵynyna qyzmet kórsetýge eseptelgen.
— Qarasha aıynda Saıaly shaǵyn aýdanynda 200 adam qabyldaıtyn taǵy bir ambýlatorııanyń qurylysy aıaqtalady dep kútilýde, — dedi Erbolat Dosaev.
Budan bólek, Alataý aýdanynda 300 tósektik kópbeıindi aýrýhana men 200 tósektik perınataldyq ortalyq boıynsha jobalaý-smetalyq qujattama ázirlenip jatyr. Sondaı-aq, 200 tósektik kópbeıindi balalar aýrýhanasyn salý josparda.
Aıta keteıik, №4 qalalyq klınıkalyq aýrýhanany, Bostandyq aýdanynda klınıkalyq-dıagnostıkalyq ortalyǵy (KDO) bar 500 kelýshige arnalǵan emhanany qaıta jańartý boıynsha qurylys -montaj jumystary bastaldy. Túrksib aýdanynda KDO-men 500 kelýshige arnalǵan emhana qurylysynyń jobalaryna, eski korpýsty buzýǵa jáne Almaly aýdanynda perzenthananyń jańa korpýsyn salýǵa oń saraptama berildi.