Almatyda qoıma órtendi
Órt sóndirýge 30-dan astam tehnıka men 100 adam jumyldyryldy, dep habarlaıdy Kazinform.
Almaty qalalyq TJD málimetinshe, 18 jeltoqsan kúni tańǵy saǵat 7.19-da Almaly aýdany Raıymbek dańǵyly, 212/2 mekenjaıynda qoımada órt shyqqany jaıly habar túsken.
TJD bastyǵynyń birinshi orynbasary, polkovnık Asan Aıteevtiń aıtýynsha, órt sóndirýshiler oqıǵa ornyna jetken sátte qoımanyń ashyq jalynmen órtengeni belgili bolǵan.
Qoıma qyzmetkeri ýaqytyly habarlamaǵandyqtan jalyn aýmaǵy ulǵaıa túsken.
«Órt ornynda dereý jedel shtab qurylyp, múddeli qalalyq qyzmetter (Almaty sý) tartyldy, úsh jaýyngerlik aımaq qurylyp, órtti sóndirý jáne kórshi qoımalardy qorǵaý úshin órt oqpandary engizildi. Raıymbek dańǵylynan sý úzdiksiz berildi. Qoıma ishindegi tym kúsheıip ketken tilsiz jaý sóndirý jumysyn qıyndatty, bul órttiń tez taralýyna, joǵary temperatýra men qoıý tútinniń paıda bolýyna yqpal etti. Bul rette ishinde taýar-materıaldary (karton, qaǵaz ónimderi, azyq-túlik) bar jaqyn mańdaǵy qoımalarǵa órttiń taralýyna jol berilgen joq», — dedi Asan Aıteev.
Órt tańǵy saǵat 8:50-de oqshaýlanyp, 9:45-te tolyq óshirildi.
Zardap shekken eshkim joq.
