Almatyda kóshelerdiń birinde kólik qozǵalysy shekteledi
ALMATY. KAZINFORM — Almatyda jylý jelilerin jóndeý kezinde Batys Jeltoqsan kóshesinde kólik qozǵalysy ishinara shekteledi.
Almaty ákimdiginiń málimetinshe, 24 sáýirden 31 mamyrǵa deıin M.Gandı kóshesinen Tımırıazev kóshesine deıingi aralyqtaǵy Batys Jeltoqsan kóshesinde kólik qozǵalysy ishinara shekteledi.
Sebebi, magıstraldy qubyr aýystyrylyp, jol tósemi ortasha jóndeýden ótedi.
«32 jyldan astam paıdalanylyp kele jatqan qubyr zaqymdanýyna baılanysty jańartýdy qajet etedi. Sońǵy bes jylda munda 17 zaqym tirkeldi» dep habarlady Almaty ákimdigi.
Kún saıyn saǵat 07:00–den 22:00–ge deıin Batys Jeltoqsan kóshesindegi qozǵalys soltústikke qaraı birjaqty bolady.
Kún saıyn 22:00–den 07:00–ge deıin jáne demalys kúnderi qozǵalys eki jaqqa da jabylady.
Gandı kóshesinen ońtústik baǵyttaǵy Ál-Farabı dańǵylyna shyǵatyn jol Qozybaev kóshesi boıynsha uıymdastyrylady.
«2 mamyrdan bastap Ál-Farabıden Tımırıazevke deıingi Batys Jeltoqsan kóshesinde ortasha jóndeý jumystary bastalady, trotýarlar, aryq jelisi jáne búlingen jıekter jóndeledi. Polımerdi qoldana otyryp, qubyr men asfaltbeton tóseledi. 1 maýsymǵa deıin qozǵalys tolyq qalpyna keltiriledi» delinedi ákimdiktiń habarlamasynda.
Eske salsaq, 21 sáýirde Almatyda jartylaı marafon ótken edi.
Osyǵan oraı marafon ótetin jerlerde kólik qozǵalysy ishinara shektelgen bolatyn.
