Almatyda qoǵamdyq keńistikti kógaldandyrýǵa tegin kóshet beriledi
ALMATY. KAZINFORM — Almatyda «Jasyl aýla» aktsııasyna qatysý úshin qala turǵyndarynan ótinimder qabyldaý bastaldy.
Jyl saıynǵy aktsııa aıasynda qala turǵyndary kópqabatty úılerdiń aýlalary men qoǵamdyq keńistikterdi kógaldandyrý úshin japyraqty aǵashtardyń kóshetterin tegin ala alady.
— Aktsııanyń negizgi maqsaty — jasyl qordy kóbeıtý jáne saqtaý baǵdarlamasyn jalǵastyrý, sondaı-aq turǵyndar arasynda ekologııalyq mádenıetti qalyptastyrý, — dep habarlady ákimdikten.
Tegin kóshetterdi alý úshin ótinimder 1-11 sáýir aralyǵynda qabyldanady. Qatysý úshin zhasyl_aula_2025@mail.ru elektrondyq poshtasyna myna derekterdi jiberý qajet:
1. Bastamashyl tulǵanyń aty-jóni jáne baılanys derekteri, kóshet otyrǵyzylatyn naqty mekenjaı;
2. Kóshet otyrǵyzylatyn alańynyń birneshe fotosýreti (mamandar ornalasqan jerdi baǵalaı alatyndaı panoramalyq fotosýret);
3. Qansha kóshet qajet ekenin jazý kerek. Aktsııaǵa qatysatyn qala turǵyndary bolashaqta otyrǵyzylǵan kóshet týraly fotoreportaj usynady.
Aktsııa boıynsha qosymsha aqparat alý úshin Almaty qalasy Ekologııa jáne qorshaǵan ortany basqarý basqarmasynyń jasyl qor monıtorıngi jáne basqarý bólimine myna telefon arqyly habarlasýǵa bolady: +7 771 894 34 57.
Eske salaıyq, buǵan deıin Almatyda jeke úılerdiń qorshaýyn syrlaýǵa tegin boıaý berilgenin jazǵanbyz.