Almatyda kıbersporttan ALMA CUP 2024 týrnıri ótti
ALMATY. KAZINFORM – ALMA CUP 2024 týrnıri álemdegi eń tanymal oıyndardyń biri – Counter-Strike: Global Offensive oıyny boıynsha uıymdastyryldy.
«ALMA CUP 2024» jobasy aıasynda JOO men kolledjder arasynda kıbersporttan týrnır Almaty qalasy Jastar saıasaty basqarmasynyń qoldaýymen ótti. Aıta keteıik, «ALMA CUP» – shaǵyn fýtbol, basketbol, voleıbol jáne kıbersport sııaqty komandalyq oıyndardy qamtıtyn aýqymdy sporttyq týrnır.
Kıbersport boıynsha ótken týrnırdiń júlde qory 4 800 000 teńgeni qurady. Jarysqa Almatynyń joǵarǵy oqý oryndarynan 16 komanda qatysty.
Týrnır nátıjesi boıynsha Qazaq bas sáýlet-qurylys akademııasynyń komandasy 3 orynǵa ıe boldy. Ekinshi orynǵa Qazaqstan-Brıtan tehnıkalyq ýnıversıtetiniń komandasy jaıǵassa, úzdik nátıje kórsetken Halyqaralyq aqparattyq tehnologııalar ýnıversıtetiniń stýdentteri altyn júlde jeńip aldy.
