Almatyda qaıta óńdelgen plastıkten jasalǵan alǵashqy aqparattyq taqtaısha ornatyldy
ALMATY. KAZINFORM – Ekolog kúnine oraı Almaty qalasynda qaıta óńdelgen plastıkten jasalǵan alǵashqy aqparattyq taqtaısha ornatyldy. Bul bastama ekologııa men turaqty damý máselelerine qoǵam nazaryn aýdarýǵa baǵyttalǵan.
Almaty ákimdiginiń habarlaýynsha, taqtaıshada aǵash týraly málimetter, ıaǵnı onyń túri, jasy jáne erekshelikteri kórsetilgen. Ázirge mundaı taqtaısha Maqataev kóshesi men Nazarbaev dańǵylynyń qıylysynda ornalasqan 1888 jyly otyrǵyzylǵan emen aǵashynyń janynda ornatyldy. Bolashaqta álemniń jetekshi megapolısteriniń tájirıbesine súıene otyryp, qaladaǵy kópjyldyq aǵashtardyń basym bóligi osyndaı taqtaıshamen jabdyqtalmaq.
Bul qadam qala turǵyndarynyń ekologııalyq sanasyn qalyptastyrýǵa baǵyttalǵan aýqymdy baǵdarlamanyń bir bóligi. Respýblıkalyq «Taza Qazaqstan» bastamasy men «Almaty – bizdiń ortaq úıimiz» qalalyq baǵdarlamasy aıasynda shaharda qoqysty suryptap jınaý júıesin engizý jáne sanaly tutyný mádenıetin damytý boıynsha turaqty túrde ekologııalyq is-sharalar men aktsııalar ótkizilip keledi.
Almaty qalasy ákimdigi janyndaǵy jobalyq keńseniń qoldaýymen ashylǵan alǵashqy Ekohab bazasynda (Markov kóshesi, 44) jınalǵan plastık qaqpaqtardan salpynshaqtar, tireýishter, taqtaıshalar, shahmat taqtalary men fıgýralar, sondaı-aq kóshe jıhazdarynyń elementteri syndy paıdaly ári sándik buıymdar jasalyp otyr.