Kásipkerlerge tegin quqyqtyq kómek kórsetildi
ALMATY. KAZINFORM – «Bızneske jol» jáne «Sybaılas jemqorlyqqa qarsy volonterlik» jobalary sheńberinde Almatydaǵy saýda oıyn-saýyq ortalyqtarynyń birinde kásipkerlerge tegin quqyqtyq kómek kórsetildi.
Almaty qalasy boıynsha Sybaılas jemqorlyqqa qarsy qyzmetiniń uıymdastyrýmen megapolıstiń «Atakent mall» saýda oıyn-saýyq ortalyǵynda kásipkerlerge tegin quqyqtyq kómek kórsetý boıynsha aktsııa ótti. Aktsııanyń negizgi maqsaty – ákimshilik kedergiler, protsesterdiń ashyq bolmaýy, artyq talaptar qoıý syndy qıyndyqtarǵa tap bolǵan kásipkerlerdiń problemalyq máselelerin sheshý. Zań konsýltatsııasyn Sybaılas jemqorlyqqa qarsy mobıldi top ókilderi, zańgerler men eriktiler kórsetti.
«Aktsııa aıasynda qalanyń kásipkerleri memlekettik organdardyń basshylarynan jáne volonter retinde qyzmet etken bilikti zańgerlerden turatyn Sybaılas jemqorlyqqa qarsy mobıldi toptan quqyqtyq keńes aldy. Kásipkerlerge yńǵaıly bolýy úshin is-sharany ótkizý orny retinde 340-tan astam bıznes sýbektisi ornalasqan «Atakent mall» saýda oıyn-saýyq ortalyǵy tańdaldy. Máselelerdiń kópshiligi salyq salý, keden suraqtary, jer qatynastary jáne qurylys salalary boıynsha kóterildi», - dedi Almaty qalasynyń Sybaılas jemqorlyqqa qarsy qyzmetiniń Preventsııa basqarma basshysynyń orynbasary Arystan Asqar.
