Almatyda qandaı mamandarǵa tapshylyq bar

ALMATY. KAZINFORM - Almaty qalasy Jumyspen qamtý jáne áleýmettik baǵdarlamalar basqarmasynyń «Almaty qalasy Eńbek mobıldiligi ortalyǵy» Kazinform saýalyna jaýap joldap, megapolıste suranys ıe mamandyqtardyń tizimin usyndy. 

Almaty qalasy Eńbek mobıldiligi ortalyǵy Enbek.kz portalyndaǵy málimetterge súıene otyryp, Almatyda bilim berý jáne tárbıeleý, medıtsına jáne farmatsevtıka salalarynda jáne biliktiligi joq mamandyqtar boıynsha jumysshy tapshy ekenin habarlady.

Onyń ishinde ár sala boıynsha suranysqa ıe TOP-3 mamandyq kelesideı:

1) Bilim berý jáne tárbıeleý salasy: tárbıeshi, tárbıeshiniń kómekshisi, psıholog; 

2) Medıtsına jáne farmatsevtıka salasy: meıirbıke, sanıtar, akýsher;

3) Biliktiligi joq mamandyqtar salasy: kúzetshi, qosalqy jumysshy, júk tasýshy.

Sondaı-aq Eńbek mobıldiligi ortalyǵy Almatyda jalaqysy joǵary jáne tómen mamandyqtar boıynsha málimet berdi. Atap aıtqanda, 800-950 myń teńge kólemindegi aılyqqa «satý bóliminiń basshysy», «sapa jónindegi ınjener», «tis dárigeri» mamandyqtaryna suranys bar. Al 85 myń kólemindegi jalaqyǵa «eden jýýshy», «vahter», «qosalqy jumysshy», «aýla sypyrýshy» jáne t.b. jumysshylar izdestirilip jatyr.

Al, almatylyqtar negizinen muǵalim, býhgalter, qarjyger, satý jónindegi menedjer, kassır, satýshy jáne t.b. jumys oryndary boıynsha vakansııa izdeıdi.

Jalpy Eńbek mobıldiligi ortalyǵyna jyl basynan beri 58 765 azamat júginip, 43 171 azamat jumyssyz retinde tirkelse, onyń ishinde 21 182 azamat jumyspen qamtylǵan.

- Ortalyq óńirdiń jumys kúshine suranys pen usynysqa taldaý jáne boljam jasaıdy, halyqty óńirdiń eńbek naryǵynyń jaı-kúıi týraly habardar etedi jáne mansap ortalyqtaryn basqarady. Eńbek mobıldiligi ortalyǵy jumys berýshiler men jumyssyz azamattarǵa eńbek deldaldyǵyn qamtamasyz etý maqsatynda mansap ortalyqtary arqyly qyzmetter kórsetedi, - dep habarlady mekemeden.

Aıta ketken jón, Eńbek mobıldiligi ortalyǵy kelesi qyzmetterdi usynady:

1. Jumys izdep júrgen adam retinde tirkelý; 

2. ⁠Jumyssyz retinde tirkelý; 

3. Jumyspen qamtýǵa járdemdesýdiń belsendi sharalaryna joldamalar berý; 

4. Jumyssyz retinde tirkelgeni týraly aqparat berý; 

5. Memlekettik ataýly áleýmettik kómek taǵaıyndaý.

Eske salaıyq, buǵan deıin jumysshylardyń jalaqysy qanshalyqty óskenin jazǵanbyz.