Almatyda Qalqaman metro beketine deıingi týnnel tolyq qazyldy
ALMATY. KAZINFORM – Almatyda metronyń jańa beketine deıingi týnnel qazý jumystary aıaqtaldy.
Almaty ákimdiginiń málimetinshe, qoldanystaǵy «Baýyrjan Momyshuly» metro beketi men jańa «Qalqaman» beketi arasynda uzyndyǵy 1593 metr bolatyn oń baǵyttaǵy tonneldi qazý jumystary tolyq aıaqtaldy.
- Qazirgi ýaqytta temirjol tutas tabandy tehnologııa boıynsha tóselip jatyr. Sol jaq baǵyttaǵy tonnel tolyq daıyn: onda relster men baılanys relsi ornatylyp, barlyq ınjenerlik jeliler montajdalǵan, - dep habarlady ákimdikten.
Sonymen qatar jańa bekettiń qurylysy aıaqtalǵan. Onda ishki árleý jumystary júrgizilip jatyr.
Eske salaıyq, Almatyda «Qalqaman» beketiniń jobasy 2020 jyly qolǵa alyndy. Qurylys jumystary 2022 jyly bastaldy.
Buǵan deıin beket qurylysymen aınalysyp jatqan kompanııa qarjylandyrý birqalypty bólinbegendikten, jumys qarqyny tómen bolǵanyn málimdedi: 2020 jyly – 190 mln teńge, 2021 jyly – 600 mln, 2022 jyly – múldem qarjy bólinbegen. Negizgi qarjy 2023 jyldan bastap túse bastaǵan: 9,2 mlrd (2023), 2,3 mlrd (2024), 28 mlrd (2025), al 2026 jyly taǵy 17 mlrd teńge qarastyryldy.
Almaty ákimdigi «Qalqaman» metro beketiniń qurylysyn 2026 jyldyń alǵashqy jartysynda aıaqtaýdy josparlap otyrǵanyn naqtylady.