Almatyda hosteldegi órt boıynsha sottalǵandar apellıatsııalyq shaǵym túsirdi
ALMATY. KAZINFORM – Almatyda 13 adamnyń ómirin qıǵan qaıǵyly isi boıynsha aıyptalǵandar apellıatsııalyq shaǵym túsirgen.
– Atalǵan qylmystyq is boıynsha advokattar men aıyptalýshylardan sot úkimine qatysty apellıatsııalyq shaǵymdar tústi. Qazirgi ýaqytta is apellıatsııalyq ınstantsııaǵa áli kelip túsken joq, - dep jaýap berdi Almaty qalalyq soty agenttik saýalyna.
Eske salaıyq, bul is sotta Qylmystyq kodekstiń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha qaraldy. Sot otyrysynyń qorytyndysy boıynsha ALA Hostel dırektory Ádilbek Muhamedıarov 5 jylǵa bas bostandyǵynan aıyryldy, Aleksandr Pekelnık 4 jylǵa sottaldy.
2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıesi belgili boldy. Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
2023 jyldyń jeltoqsan aıynda hosteldiń basshysy ustaldy.