Almatyda gaz qubyrynyń jarylýynyń aldyn ala sebebi ataldy
ALMATY. KAZINFORM — Aldyn ala boljam boıynsha, jarylýǵa sebep bolǵan jasyryn óndiristik aqaý, naqtyraq aıtqanda, 426 mm dıametrli tútiktiń zaýyttyq jiginiń tutastyǵynyń buzylýy.
Almatydaǵy gaz qubyrynyń jarylý sebebi aldyn ala belgili boldy
Almatyda jer asty gaz qubyrynyń jarylýyna aldyn ala boljam boıynsha qubyrdaǵy jasyryn óndiristik aqaý, dıametri 426 mm bolatyn tigisti tútik boıyndaǵy zaýyttyq jiktiń tutastyǵynyń buzylýy sebep bolýy múmkin, dep habarlaıdy Kazinform agenttiginiń tilshisi.
«QazaqGaz Aimaq» AQ málimetinshe, oqıǵa orta qysymdy gaz qubyryn qaıta jańartý jumystary kezinde bolǵan. «SantehKomplektGrýpp» JShS mamandary buǵan deıin salynǵan, biraq paıdalanýǵa berilmegen ýchaskelerdi biriktirip jatqan.
– Qaıta jańartý jumystary 1972 jyly paıdalanýǵa berilgen eski gaz qubyrynyń tozýyna baılanysty júrgizildi, – dep naqtylady kompanııa ókilderi.
Belgili bolǵandaı, tehnologııalyq tyǵyndy kesý kezinde qubyr jarylyp, aýa qospasy syrtqa shyqqan. Saldarynan jol jabyny, birneshe kólik jáne bir aǵash zaqymdanǵan.
– Zardap shekkenderdiń qatarynda bir kóliktiń júrgizýshisi men jolaýshysy bar, olarǵa medıtsınalyq kómek kórsetildi. Halyqty gazben qamtý toqtatylǵan joq. Qaza tapqandar joq. Buǵan deıin aýdan turǵyndaryna josparly jumystarǵa baılanysty gaz ýaqytsha ajyratylatyny eskertilgen, – delingen habarlamada.
Oqıǵa ornyna dereý «QazaqGaz Aimaq» AQ Almaty fılıalynyń apattyq jáne tehnıkalyq qyzmetteri shyqty. Júrgizilgen tekseris nátıjesinde gazdyń syrtqa shyǵý faktileri anyqtalǵan joq. Qosymsha tekserý úshin fılıaldyń elektrohımııalyq qorǵaý qyzmeti tartyldy.
– Qazirgi ýaqytta zaqymdanǵan ýchaske ashylyp, tehnıkalyq saraptama júrgizilip jatyr. Sondaı-aq oqıǵa ornynda jergilikti gaz qyzmetiniń mamandary kezekshilik atqaryp, jaǵdaıdy baqylap otyr. Bul halyqty gazben qamtýda qaýip-qaterlerdiń aldyn alý úshin qolǵa alynǵan shara, – dep qosty kompanııa ókilderi.
Merdiger uıym keltirilgen shyǵynnyń ornyn tolyq óteýge mindetteldi. «QazaqGaz Aimaq» kompanııasy qalpyna keltirý jumystary qysqa merzimde tolyq aıaqtalatynyna sendirdi.
Eske salaıyq, buǵan deıin Almatyda Buqar Jyraý men Baızaqov kósheleriniń qıylysynda gaz qubyry jarylǵan.