Almatyda ǵalymdarǵa páter sertıfıkattary tabystady
ALMATY. KAZINFORM – Konstıtýtsııanyń 30 jyldyǵyna arnalǵan merekelik is-sharada Memleket basshysynyń tapsyrmasy boıynsha Ǵylym jáne joǵary bilim vıtse-mınıstri Gúlzat Kóbenova 8 jas ǵalymǵa páter sertıfıkattaryn saltanatty túrde tabystady.
Іs-sharanyń ashylý saltanatynda vıtse-mınıstr Gúlzat Kóbenova ǵalymdardy turǵyn úımen qamtamasyz etý – mańyzdy baǵyttardyń biri ekenin aıtty.
- Biz elimizde ǵylymnyń damýyna qajetti barlyq jaǵdaıdy jasaýǵa umtylamyz jáne bul jolda ǵalymdardy turǵyn úımen qamtamasyz etý – mańyzdy baǵyttardyń biri. Maqsatymyz – jas mamandardy qoldaý ǵana emes, sonymen qatar olardyń jańa jetistikterge jetýine shabyt berý. Jaıly ómir súrý jáne kásibılikti shyńdaý ortasyn qurý – ǵalymdarymyzdyń áleýetin ashyp, Qazaqstandaǵy ǵylymı zertteýlerdiń halyqaralyq arenada básekege qabiletti bolýyna yqpal etedi dep senemiz, – dedi.
Sondaı-aq shara barysynda Qazaqstan Respýblıkasy Konstıtýtsııasynyń 30 jyldyǵyna oraı ǵylym salasyndaǵy qyzmetkerler marapattaldy.
Prezıdenttiń 2024 jylǵy 31 mamyrda «Ǵylym ordasynda» jas ǵalymdarmen kezdesýde bergen tapsyrmasyn iske asyrý maqsatynda ǵalymdardyń áleýmettik mártebesin kóterý, qoldaý kórsetý jáne ǵylymǵa jas kadrlardyń kelýin yntalandyrý sharalary qabyldanýda. Osyǵan sáıkes Komıssııa Almaty qalasynda baspana berý úshin memlekettik organdarǵa vedomstvolyq baǵynysty ǵylymı uıymdar men joǵary jáne joǵary oqý ornynan keıingi bilim berý uıymdarynyń jas ǵalymdarynyń kezekti tizimin aıqyndady.
Mınıstrlik aǵymdaǵy jylǵy mamyr aıynan bastap baspanaǵa muqtaj jas ǵalymdardyń (40 jasqa deıin qosa alǵanda) tizimin qalyptastyrý boıynsha jumys júrgizýde. Almaty qalasynda ornalasqan memlekettik organdarǵa vedomstvolyq baǵynysty ǵylymı uıymdar men joǵary oqý oryndarynan 300-ge jýyq ótinim kelip tústi.
Jas ǵalymdar sanynyń artýy ǵylymnyń damýyna, ǵylymı jáne ǵylymı-tehnıkalyq qyzmet nátıjelerin kommertsııalandyrýǵa, sondaı-aq jańa ekonomıkalyq klasterler qurýǵa oń áser etedi.
Sonymen qatar 2023 jylǵy 19 qazanda Ǵylym jáne joǵary bilim mınıstrligi men «Otbasy bank» AQ arasynda jas ǵalymdarǵa 2023-2027 jyldarǵa arnalǵan jeńildetilgen kredıt berý baǵdarlamasy boıynsha yntymaqtastyq týraly kelisimge qol qoıylǵan bolatyn. Qazirgi ýaqytta atalǵan baǵdarlama boıynsha 477 jas ǵalym jeńildikpen baspana aldy.
Mereke qarsańynda Ǵylym jáne joǵary bilim mınıstrliginiń birqatar qyzmetkeri «Qazaqstan Respýblıkasynyń Konstıtýtsııasyna 30 jyl» mereıtoılyq medalimen, sondaı-aq «Ana tilin damytýǵa qosqan úlesi úshin» jáne «Ahmet Baıtursynuly» tósbelgileri sııaqty vedomstvolyq nagradalarmen marapattaldy.
Aıta ketelik Prezıdent Jarlyǵymen «Qazaqstan Respýblıkasynyń Konstıtýtsııasyna 30 jyl» mereıtoılyq medali bekitildi.